Kárahnjúkar mbl.is/ÞÖK

Eftir Magnús Halldórsson magnush@mbl.is

„Ég geri ráð fyrir að arðsemismat vegna Kárahnjúkavirkjunar verði endurskoðað í náinni framtíð, en það er eitthvað sem gert er reglulega. Það er ekkert nýtt að það sé endurskoðað heldur fullkomlega eðlilegt og sjálfsagt,“ segir Friðrik Sophusson, forstjóri Landsvirkjunar. Greint var frá því í Fréttablaðinu í gær að mögulega yrði arðsemismat Kárahnjúkavirkjunar endurskoðað. Það var endurreiknað úr 11,9 prósentum á eigið fé í 13,4 prósent í byrjun þessa árs.

Gera má ráð fyrir að endurskoðað arðsemismat verði nokkru lægra en það sem gert var ráð fyrir í byrjun ársins en þá var að heimsmarkaðsverð á áli að hækka hratt. Það náði hæstu hæðum í júlí á þessu ári. Staðgreiðsluverð á heimsmarkaði var þá um 3.300 dollarar en það er nú um 1.500 dollarar. Verð á áli hefur aldrei í sögunni lækkað eins hratt og á síðustu fimm til sex mánuðum.

Arðsemismat virkjunarinnar sem stuðst var við í upphafi gerir ráð fyrir að meðaltals heimsmarkaðsverð á áli sé um 1.550 dollarar á tonnið. Álverðið hefur bein áhrif á afkomu Landsvirkjunar þar sem sala á orku til álvera er bundin við heimsmarkaðsverð á áli.

Langtímaáætlanir Landsvirkjunar miða hins vegar ekki við staðgreiðsluverð á áli heldur framvirkt verð til lengri tíma. Það hefur enn haldist töluvert hærra en staðgreiðsluverðið, eða sem nemur 20 til 30 prósentum samkvæmt upplýsingum frá LME (London Metal Exchange). Verðið er þó misjafnt eftir lengd og eðli sölusamninga.

Töluverðrar óvissu gætir í áliðnaði í heiminum í ljósi mikilla verðlækkana á hrávöru, þar með töldu áli. Verðlækkanaferlið sem hófst um mitt ár stafar af hratt minnkandi eftirspurn í kjölfar mestu efnahagslægðar á heimsvísu í meira en heila öld. Óvissu gætir um hversu lengi hún mun vara en fæstar spár erlendra sérfræðinga, hjá fjármálastofnunum og bönkum, hafa gert ráð fyrir þeim miklu hremmingum sem einkennt hafa hrávörumarkaði undanfarna mánuði. Lægðin hefur reynst miklu dýpri en talið var.