Forseti Íslands, Ólafur Ragnar Grímsson, afhenti Halldóri Ho, Eddu Ólafsdóttur og félaginu Móðurmál viðurkenningu Alþjóðahúss „Vel að verki staðið“ fyrir lofsverða frammistöðu í málefnum innflytjenda á Íslandi við athöfn í Alþjóðahúsinu í dag.
 
Viðurkenningunni, sem nú er veitt í sjötta skipti, er ætlað að vekja athygli á jákvæðu starfi sem unnið er hér á landi í málefnum innflytjenda. Veittar voru viðurkenningar fyrir lofsverða frammistöðu í þremur flokkum: til einstaklings af erlendum uppruna sem hefur lagt sitt af mörkum til samfélagsins, til einstaklings af íslenskum uppruna sem hefur lagt sitt af mörkum til innflytjenda á Íslandi og til fyrirtækis, stofnunar eða félagasamtaka fyrir framlag til málefna innflytjenda og fjölmenningarsamfélagsins, að því er segir í tilkynningu.
 
 Halldór Ho

Halldór er fæddur í Víetnam og kom til Íslands í hópi flóttamanna árið 1979. Hann hefur unnið sem vélvirki, túlkur, þýðandi og nú síðast við tölvumál. Halldór lærði hagfræði í Víetnam áður en hann kom til Íslands. Hann útskrifaðist í vélvirkjun frá Iðnskólanum í Reykjavík árið 1984 og vann hjá Vélamiðstöð Reykjavíkur í 14 ár. Halldór var einnig viðriðinn veitingarekstur í nokkur ár en árið 1999 hóf hann nám á tölvufræðibraut  við Iðnskólann í Reykjavík. Tölvuorðabókina vann hann síðan hjá Mími á árunum 2006-2007.
 
Halldór Ho hefur gegnt mjög mikilvægu hlutverki varðandi málefni Víetnama á Íslandi á liðnum árum. Nýlega vann hann og gaf út í samstarfi við Mími víetnamska-íslenska tölvuorðabók. Starf hans við vinnslu orðabókarinnar sýnir þrautseigju hans og elju en hugmyndin að gerð tölvuorðabókarinnar vaknaði fyrst hjá honum fyrir tæpum 10 árum.
 
Edda Ólafsdóttir

Edda Ólafsdóttir er félagsráðgjafi hjá Þjónustumiðstöð Miðborgar og Hlíða og hefur starfað að málefnum innflytjenda í rúmlega 10 ár. Hún vann að stefnumótun Reykjavíkurborgar um málefni innflytjenda og hefur verið virk í samstarfsteymi um málefni innflytjenda. Edda kom að stofnun teymisins og hefur í starfi sínu sem félagsráðgjafi hjá Félagsþjónustunni í Reykjavík og seinna Þjónustumiðstöð Miðborgar og Hlíða haft margvísleg tengsl við málefni innflytjenda. Málefni fjölskyldna og barna er henni sérstakt áhugamál.
 
Edda vann að móttöku flóttamanna frá Kólumbíu sem kom til landsins 2007 og hefur setið í ýmiss konar samstarfshópum um málefni innflytjenda innan og utan vinnustaðar síns. Þar má nefna sem dæmi Allar heimsins konur, hóp um málefni fjölskyldna, Norrænt-Eystrasaltsverkefni um úrræði til aðstoðar fórnarlömbum mansals o.fl.
 
Edda hefur auk þess komið að kennslu og fræðslu í Háskóla Íslands og Endurmenntun Háskóla Íslands um málefni innflytjenda.
 
Móðurmál

Móðurmál er félag um móðurmálskennslu tvítyngdra barna. Meginmarkmið félagsins er að gefa tvítyngdum börnum tækifæri til að læra og viðhalda eigin móðurmáli og menningu. Rannsóknir hafa sýnt fram á að börn sem fá að læra tungumál foreldra sinna eiga auðveldara með að læra nýtt tungumál, í þessu tilfelli íslensku. Móðurmál leitast við að styðja kennara félagsins, afla þekkingar á tvítyngi og hvetja foreldra sem eiga tvítyngd börn til að veita börnum sínum tækifæri til að kynnast eigin móðurmáli og menningu.
 
Móðurmálskennsla eða leiðbeiningar fyrir tvítyngd börn hefur verið í boði hér á Íslandi síðan árið 1993 en félagið Móðurmál var formlega stofnað árið 2001. Tilgangur félagsins var og er að þróa tungumálanám með skýrum markmiðum og námskrá. Námið er fjármagnað með skólagjöldum og styrkjum.
 
Námskeiðin sem haldin eru hjá Móðurmáli eru sérstaklega ætluð þeim börnum sem búa við tvö eða fleiri tungumál á sínu heimili. Móðurmál hefur boðið upp á námskeið í ensku, litháísku, rússnesku, spænsku, japönsku, arabísku, kínversku, pólsku, tælensku og hollensku. Kennarar, stjórn og faglegir leiðbeinendur eru allir í sjálfboðavinnu.