„Ég á ekki bloggsíðu á mbl.is og er ekki skráður þar heldur læt mér nægja að skrifa á heimasíðu mína. Færslurnar eru því ekki frá mér komnar,“ segir Kristinn H. Gunnarsson alþingismaður en óprúttinn einstaklingur setti í gærkvöld inn nokkrar færslur á bloggsvæði mbl.is í hans nafni og birti myndir af Kristni með færslunum.

Færslurnar fóru sumar langt út yfir öll velsæmismörk. Lokað hefur verið fyrir þann einstakling sem setti inn færslurnar og hafa þær verið fjarlægðar.

Færslurnar voru settar inn sem athugasemdir við fréttir á mbl.is og inn í gegnum athugasemdakerfi á nokkrum bloggsíðum mbl.is. Notendur þurfa að skrá sig inn með kennitölu en ekki er hægt að hindra að misnotkun sem þessi eigi sér stað. Dæmin eru fá en ef slíkt kemur upp er umsvifalaust lokað fyrir viðkomandi einstakling.

Breytingar á bloggi mbl.is

Frá og með 1. janúar næstkomandi verður einungis hægt að blogga um fréttir á mbl.is ef fullt nafn bloggara birtist á bloggsíðu hans. Bloggarar geta eftir sem áður bloggað undir stutt- eða gælunafni, en fullt nafn viðkomandi þarf að koma fram á höfundarsíðu til þess að möguleikinn að blogga um fréttir sé til staðar.

Sú breyting verður einnig á að blogg þeirra sem ekki eru með fullt nafn sýnilegt á höfundarsíðu mun ekki birtast á forsíðu blog.is eða á öðrum síðum mbl.is.

Þessi breyting er að ákvörðun ritstjórnar mbl.is, en einnig hafa borist tilmæli frá talsmanni neytenda. Sendur hefur verið póstur til bloggara með leiðbeiningum hvernig þeir geta birt fullt nafn á höfundarsíðu bloggsins. Langstærstur hluti bloggara birtir þegar nafn sitt og því hefur þetta áhrif á lítinn hluta bloggara.