Neytendastofa hefur til skoðunar auglýsingar Stöðvar 2 sem birst hafa að undanförnu. Þar er m.a. sagt að þar sem fólk þurfi ekki lengur að greiða afnotagjöld RÚV geti það varið sömu fjárhæð í að bæta við 3.595 kr. upp í áskrift að Stöð 2.

Afnotagjöldin voru sem kunnugt er lögð af um áramótin en í stað þeirra tekinn upp svonefndur nefskattur vegna RÚV, sem tekinn verður af öllum skattgreiðendum við næstu álagningu.

Tryggvi Axelsson, forstjóri Neytendastofu, staðfesti að ábending hefði borist og sagði að fyrirspurn yrði send til Stöðvar 2. Samkvæmt lögum ber Neytendastofu að fylgjast með því að auglýsingar á vöru og þjónustu séu sannar og réttar og ekki villandi.

Jóhannes Gunnarsson, formaður Neytendasamtakanna, sem jafnframt er formaður siðanefndar Sambands íslenskra auglýsingastofa, SÍA, segist hafa séð þessa auglýsingu Stöðvar 2 og hún væri vægt til orða tekið á gráu svæði. Gísli Tryggvason, talsmaður neytenda, segir óeðlilegt að gefa í skyn í auglýsingunni að um einhvern sparnað geti verið að ræða. Aðeins sé um formbreytingu á skattlagningu að ræða vegna RÚV og mörg heimili þurfi nú að greiða meira en áður.

Pétur Pétursson, framkvæmdastjóri sölusviðs 365 miðla, segir það alþekkt að almenningur beri áfram skattbyrði af RÚV. Auglýsingin sé aðeins að vísa til þeirrar breytingar að beinni innheimtu afnotagjalda hafi verið hætt og innheimtuseðill berist því ekki mánaðarlega. „Að gera athugasemdir við þetta er svipað og að halda því fram að auglýst verð á lambalæri hverju sinni sé rangt þar sem neytendur greiða það stórlega niður á hverju ári gegnum skatta.“