Þrír piltar sakfelldir fyrir kynferðisbrot
Héraðsdómur Suðurlands. mbl.is
Héraðsdómur Suðurlands sakfelldi í dag þrjá unga pilta fyrir kynferðisbrot gegn tólf ára pilti. Refsingu var frestað í tvö ár en piltarnir voru dæmdir til að greiða fórnarlambi sínu 100 þúsund krónur í miskabætur.
Ákæra ríkissaksóknari á hendur piltunum var þingfest 18. ágúst en brotin frömdu piltarnir 15. janúar 2008 í íþróttahúsi fyrir Austan fjall. Piltarnir voru ákærðir fyrir ólögmæta nauðung og kynferðisbrot með því að hafa í sameiningu neytt 12 ára gamlan dreng til að þola kynferðislega áreitni með lostugu athæfi. Ákærðu skiptu með sér verkum. Tveir piltanna tóku sér stöðu við hlið fórnarlambsins, héldu drengnum föstum og hindruðu för hans. Þriðji pilturinn leysti niður um sig buxurnar og beraði kynfæri sín fyrir drengnum og otaði þeim að andliti hans og sló hann með þeim ítrekað í andlit og hendur.
Piltarnir þrír játuðu allir brot sín fyrir dómi sögðu háttsemina ekki af kynferðislegum toga né lostugt athæfi heldur væri hún félagslegt fyrirbæri.
Í dómi héraðsdóms segir að sú háttsemi að fá beran getnaðarlim í andlit eða á líkama, gegn vilja sínum, hljóti að brjóta gegn kynfrelsi einstaklingsins og teljast auk þess siðlaus háttsemi. Breyti þar engu um að sú háttsemi sé talin eðlileg af einstökum einstaklingum, hópum eða undir vissum kringumstæðum. Engu breyti heldur í þessu sambandi að ákærða hafi ekki risið hold á meðan atvikið átti sér stað eða að hann hafi talið háttsemina vera stríðni. Háttsemin hafi verið til þess fallin að hafa einhvers konar kynferðisleg hughrif hjá brotaþola. Að öðrum kosti hefði getnaðarlimur ekki verið notaður við framkvæmdina enda þótti brotaþola háttsemin ógeðsleg og hommaleg.
Að mati dómsins er ljóst að háttsemin telst vera kynferðisleg áreitni eins og það hugtak hefur verið skilgreint í íslenskum rétti. Dómurinn telur einnig ljóst að drengurinn sem fyrir árásinni varð, var beittur ofbeldi með því að halda honum á meðan einn þremenninganna sló getnaðarlim sínum að andliti og höndum hans.
Að mati héraðsdóms kemur það til þyngingar refsingar, að ákærðu frömdu kynferðisbrot gegn tólf ára gömlum dreng, en alkunna er að slík brot geta haft alvarlegar afleiðingar fyrir þolanda og að um samverknað ákærðu var að ræða. Dómurinn tók hins vegar tillit til þess að drengirnir voru einungis 15 ára gamlir þegar þeir frömdu verknaðinn, þeir játuðu brotið greiðlega og þeim hefur ekki verið gerð refsing áður svo vitað sé.
Dómurinn taldi því rétt að fresta ákvörðun um refsingu yfir piltunum þremur og fellur hún niður eftir tvö ár, haldi piltarnir almennt skilorð.
Réttargæslumaður drengsins sem fyrir árásinni varð, krafðist 800 þúsund króna miskabóta. Bótakrafan ver rökstudd með þeim hætti að um sérlega niðurlægjandi árás hafi verið að ræða. Drengnum hafi fundist hann niðurlægður og svívirtur. Piltarnir þrír hafi valdið drengnum verulegum miska og óþægindum, a.m.k. af stórkostlegu gáleysi. Óljóst sé hvort árásin hafi varanlegar afleiðingar fyrir drenginn, en hún hafi haft í för með sér nokkra röskun á daglegum högum og lífi hans.
Héraðsdómur sagði ekki liggja fyrir gögn um afleiðingar háttsemi piltanna og taldi miskabætur hæfilega ákveðnar 100 þúsund krónur.
