Undirbúnir samningar um yfirtöku á tónlistarhúsinu
Hluti þess verks sem unnið hefur verið vegna glerhjúps tónlistarhússins. mbl.is
Eftir Fríðu Björk Ingvarsdóttur og Helga Bjarnason
Ólafur Elíasson, sem hannað hefur glerhjúp tónlistarhússins, segir samningaviðræður um húsið nú á erfiðu stigi – mjög margt sé óljóst í stöðunni. „Í fyrsta sinn er raunveruleg hætta á því að samningaviðræður um áframhaldandi byggingu hússins fari út um þúfur. Ég óttast að það leiði til þess að við sitjum uppi með rúst í miðborginni.“
Ólafur segir að slík rúst væri í fyrsta lagi hrikalegur vitnisburður um minni kröfur þjóðinni til handa og í öðru lagi minnisvarði um þá ógæfu sem dunið hefur yfir landið. „Staðreyndin er sú að alla þá peninga sem búið er að eyða í að semja um byggingu hússins verður að leggja fram að nýju ef samningaferlið þarf að endurtaka seinna. Mikið fjármagn hefur þegar verið sett í bygginguna og það mun allt tapast ef byggingarferlið stöðvast núna,“ segir Ólafur.
Hann telur eina ástæðu erfiðrar stöðu Íslands nú vera „hversu framganga Íslendinga í fjármálum hefur verið gríðarlega ágeng. Menn seildust mjög langt í því að hámarka hagnað sinn. Hvað tónlistarhúsið varðar felst í þessu þversögn, því einmitt vegna þessarar tilhneigingar tókst þeim sem sömdu um verð á verkþáttum tónlistarhússins að þrýsta verðinu niður. Þeim tókst að ná fram ótrúlega lágu verði á gæðaframleiðslu, eins og til að mynda í Kína þar sem glerhjúpurinn er framleiddur.“
Unnið hefur verið að yfirtöku ríkis og borgar á verkefninu undanfarna mánuði. Stefán Hermannsson, framkvæmdastjóri Austurhafnar, er bjartsýnn á að það takist að koma framkvæmdinni af stað á ný og ljúka byggingu hússins án þess að bæta þurfi við framlag ríkis og borgar. Miðað er við að Austurhöfn eignist Portus sem tók að sér að byggja húsið í einkaframkvæmd. Uppbyggingin verði síðan fjármögnuð með láni sem tekið verði með veði í greiðslum sem ríki og borg hafa lofað að inna af hendi fyrir mannvirkið og rekstur þess næstu 35 ár. Samningarnir eru flóknir og miklir fjármuni í húfi og hafa því tekið sinn tíma. Stefán vonar að málið komist fljótlega á borð eigenda Austurhafnar sem eru ríki og borg.
