Reuters

Eftir Gunnhildi Örnu Gunnarsdóttur gag@mbl.is

Bakábyrgð á eftirlaunasjóði 100 starfsmanna Glitnis og allt að fimm hundruð fyrrverandi starfsmanna, þeirra sem komnir eru á eftirlaun, varð eftir í gamla Glitni. Fimmtíu starfsmenn bankans áttu rétt á að fara fyrr á eftirlaun, samkvæmt svokallaðri 95 ára reglu, en nú er hætta á að þeir fái það ekki.

Anna Berglind Þorsteinsdóttir er trúnaðarmaður starfsmanna Glitnis og ein af þeim sem áætlaði að hætta fyrr að vinna. Hún er 51 árs og hefði getað hætt að vinna sextug samkvæmt umsömdum lífeyrisréttindum en sér nú fram á að þurfa að vinna fimm til sjö árum lengur. „Ég trúi því ekki að ákvörðunin sé endanleg.“

Réttindi starfsmannanna voru baktryggð, þannig að ytri áhrif og staða eftirlaunasjóðsins hafði ekki áhrif á greiðslur til þeirra. Þá voru eftirlaunin miðuð við lokalaun á starfsævinni en ekki útreiknuð meðallaun, svo eitthvað sé nefnt.

Hópurinn sem óttast nú skert réttindi er elstu starfsmenn Glitnis, en allir þeir sem ráðnir voru til fyrirrennara bankans eftir 1. janúar 1994 fóru í nýtt kerfi. Friðbert Traustason, framkvæmdastjóri Samtaka starfsmanna fjármálafyrirtækja, segir skammarlegt ætli ríkið að standa fyrir því að rýra réttindi þessara starfsmanna. Hann segir samtökin líta þannig á að um sjóðinn gildi kjarasamningar. „Þannig að við teljum að svona einhliða ákvarðanir standist ekki.“ Verði réttindin skert komi til málaferla.

Anna Berglind segir að verði ekki staðið við bakábyrgð sjóðsins hræðist þau að hann standi ekki undir réttindum fólksins. Það hafi sætt sig við lægri laun vegna þessara góðu eftirlaunaréttinda. „Fólk er hrætt. Hér eru konur sem fara á eftirlaun á árinu. Þær vita ekki neitt um stöðu sína. Við höfum ekki tíma til að vinna skerðinguna upp, því við erum fullorðin. En ég lifi í voninni um að þessari ákvörðun verði breytt.“