Verjandi Jóns Ásgeirs Jóhannessonar heldur fast í þá aðalkröfu skjólstæðings síns að rannsókn ríkislögreglustjóra á skattahluta Baugsmálsins verði dæmd ólögmæt, og til vara að saksóknari efnahagsbrota, Helgi Magnús Gunnarsson, víki sæti sökum vanhæfis.

Þetta kom fram við munnlegan málflutning sem fór fram í Héraðsdómi Reykjavíkur í morgun, sem stóð yfir í um klukkustund. Gísli Hall flutti málið í umboði Gest Jónssonar, verjanda Jóns Ásgeirs. Héraðsdómarinn Arngrímur Ísberg tók málið til dómsmeðferðar að málflutningi loknum.

Verjast mörgum ákærum

Þriðja ákæran á hendur Jóni Ásgeiri var gefin út þann 18. desember sl. Að sögn Gísla er óviðandi að það sé verið að gefa út ákæru í þriðja sinn í sama máli á hendur Jóni Ásgeiri auk þess að það sé ólíðandi hve lengi málið hefur dregist. Ljós væri að rétturinn til réttlátrar málsmeðferðar væri brotinn.

„Það er búið að verjast mörgum ákærum í þessu eina og sama Baugsmáli, sem hófst í ágúst 2002. Það kemur að því að það þurfi að fá dómsúrslausn um það hversu langan tíma rannsóknarar fái til að ljúka rannsókn mála,“ segir Gísli Hall í samtali við mbl.is. 

Gísli benti jafnframt á að báðir aðilar, þ.e. ákæruvaldið og verjendur, væru sammála um það að drátturinn á meðferð málsins væri óhæfilegur. Hann segir að ríkissaksóknari hafi sett fordæmi fyrir því að máli sem rannsókn hafi dregist óhæfilega skuli vera felld niður.

Ekki sama málið

Helgi Magnús segir að það sé mikil einföldun að þetta mál hafi tekið sex ár, líkt og verjendur haldi fram. Það hafi verið kært undir lok árs 2004 til ríkislögreglustjóra. Hann ítrekar að þetta mál sé ekki sama mál og þegar hafi verið ákært og dæmt í. Þetta séu aðrar sakargiftir. Málin eigi það þó sameiginlegt að um sömu sakborninga, að hluta til, sé að ræða. „Þetta er ekki sama málið.“

Hann segir að ýmsir þættir hafi orðið þess valdandi að málið hafi tafist sem eigi sér eðlilegar skýringar. Engum blöðum sé hins vegar um það að fletta að menn hafi verið að vinna vinnuna sína. „En auðvitað er æskilegt að allt þetta kerfi gangi hraðar,“ bætir hann við.

Þá segir hann það sæta furðu að dómari í þessu máli skuli eiga að úrskurða um mál sem annar dómari sé með, þ.e. hvað varðar umrædda ákæru á hendur Jóni Ásgeiri og Kristínu Jóhannesdóttur, systur hans, sem var gefin út 18. desember, sem fyrr segir. Það mál verður þingfest í Héraðsdómi Reykjavíkur 20. janúar nk. Helgi Magnús segir að verjendur sakborninga geti haft uppi sömu kröfur þegar það mál verði tekið fyrir.

„Þessari rannsókn er lokið og svo tekur við dómsmeðferð með ákæru. Þar er hægt að hafa uppi allar þessar sömu kröfur. Það er ekki eðlilegt að héraðsdómarar við sama dómstólinn fjalli um kröfu innan sama máls,“ sagði Helgi Magnús og bætti við að hann telji að þetta standist ekki eðli laganna. Ekki sé kveðið skýrt um þetta í lögunum en þetta sé „svo langt frá eðlilegum skilningi á lögunum að það sé hægt að halda svona máli til streitu.“

Hlutleysi saksóknara ótrúverðugt

Gísli segir saksóknara hins vegar snúa málinu á haus. Það sé gert ráð fyrir því í lögum að hægt sé að fá dómsúrlausn um lögmæti rannsóknar með þessum hætti, þ.e. með því að höfða sér mál. „Annars geti menn beðið fram í það endalausa,“ segir Gísli. 

Hvað varðar hæfi Helga Magnúsar segir Gísli: „Við teljum að hann farið yfir strikið í samskiptum við fjölmiðla. Einnig er það sérkennilegt að saksóknari sé vitni í sama málinu. Hann tengist málinu með þeim hætti að það er ekki trúverðugt að hann sé hlutlaus á sama tíma. Ásýndin er þannig.“

Talið er að niðurstaða muni liggja fljótt fyrir.