Þorvaldur Örn Kristmundsson

Héraðsdómur Reykjaness hefur dæmt 18 ára gamlan pilt í mánaðar skilorðsbundið fangelsi fyrir að fingurbrjóta konu á mannfagnaði í Hafnarfirði í október árið 2007. Konan starfaði við dyravörslu á samkomunni og pilturinn lenti í átökum við dyraverði með þessum afleiðingum.

Pilturinn reyndi ítrekað að komast inn í húsið en dyraverðirnir neituðu að hleypa honum inn þar sem hann var ekki orðinn 18 ára.  Pilturinn lenti síðan í átökum við dyraverðina og í þeim tók hann um vísifingur á hægri hendi konunnar og snéri upp á með þeim afleiðingum að fingurinn brotnaði. Pilturinn var síðan fluttur á lögreglustöð og vistaður í fangaklefa. 

Pilturinn neitaði sök. Dómurinn  sagði hins vegar sannað að pilturinn hefði valdið fingurbrotinu en ekki væri hægt að sanna, að hann hefði tekið um fingurinn og snúið upp á hann af ráðnum hug.

Auk fangelsisdómsins var pilturinn dæmdur til að greiða konunni 344 þúsund í bætur.