„EINU skuldirnar sem færðar voru yfir í nýja bankann við skiptingu í gamla og Nýja Glitni voru innlán,“ svarar Fjármálaeftirlitið fyrirspurn Morgunblaðsins um ástæðu þess að bakábyrgð á eftirlaunasjóði 100 núverandi og 500 fyrrverandi starfsmanna Glitnis varð eftir í þrotabúinu. „Ennfremur voru færðar yfir ábyrgðir utan efnahags vegna inn- og útflutnings og aðrar ábyrgðir tengdar reglubundinni starfsemi bankans. Aðrar ábyrgðir, þ.m.t. vegna Eftirlaunasjóðs Íslandsbanka og orlofsréttinda starfsfólks, voru ekki yfirteknar,“ stendur í svarinu.

Friðbert Traustason, framkvæmdastjóri Samtaka starfsmanna fjármálafyrirtækja, segir yfirstjórn og stjórn Glitnis nú skoða hvort bankinn geti ábyrgst eftirlaunin en samkvæmt samningum við starfsmennina ábyrgðist gamli bankinn fullar greiðslur sama hver staða sjóðsins væri. Stjórn Nýja Glitnis hefur tvívegis farið yfir málið á stjórnarfundi og rýnt í tölur tryggingasérfræðings um kostnað við bakábyrgðina, segir Friðbert. Hópurinn bíður nú eftir svari. Neiti stjórnin ábyrgðinni muni hann snúa sér til yfirvalda og íhuga málaferli.