Varasöm hálka er á Reykjanesbraut Kristján Helgi

Rétt er að vara vegfarendur um Reykjanesbraut við því að þar hefur verið mikil ísing nú síðdegis og hafa a.m.k. tveir bílar farið út af veginum í hálkunni. Klukkan að ganga tvö valt bifreið á hættulegum einum hættulegasta kafla vegarins, við Kúagerði. Í bílnum var par með ungt barn.

Eins og sjá má skemmdist bíllinn mikið, og voru þrír sjúkrabílar frá Brunavörnum Suðurnesja og Slökkviliði höfuðborgarsvæðisins kallaðir út auk tækjabíls. Fólkið var flutt á slysadeild í Fossvogi en reyndist ekki mikiið slasað sem þykir mesta mildi miðað við harkalega veltu, að sögn slökkviliðs- og sjúkraflutningamanns hjá Brunavörnum Suðurnesja. Skömmu síðar fór annar bíll út af á svipuðum slóðum en þar urðu heldur engin slys á fólki.

Vegagerðin vara við hálku og hálkublettum um land allt. Veður fer nú versnandi á Norðurlandi frá Skagafirði austur að Melrakkasléttu og er spáð vaxandi ofanhríð og skafrenningi með afar takmörkuðu skyggni og erfiðum aksturskilyrðum.

Ófært er um Hrafnseyrar-og Dynjandisheiði og þungfært um Steingrímsfjarðarheiði þar sem er stórhríð og beðið moksturs vegna veðurs.