Minna var verslað fyrir jólin nú en fyrir ári. mbl.is/Sverrir

Velta í dagvöruverslun dróst saman um 10,4% á föstu verðlagi í desember miðað við sama mánuð árið áður. Á breytilegu verðlagi jókst veltan hins vegar um 18,2% á sama tímabili. Í þessu felst að jólaverslunin minnkaði að raunvirði þó neytendur verðu fleiri krónum til innkaupanna en árið áður. Verð á dagvöru hækkaði um 32% frá desember 2007 til desember 2008.

Þetta kemur fram í nýju yfirliti frá Rannsóknasetri verslunarinnar. Sala á áfengi minnkaði um 9,1% í desember miðað við sama mánuð árið áður á föstu verðlagi og jókst um 16,5% á breytilegu verðlagi. Verð á áfengi hækkaði um 28,1% í desember síðastliðnum miðað við sama mánuð árið áður samkvæmt verðmælingu Hagstofu Íslands.
 
Fataverslun minnkaði einnig í desember. Velta fataverslunar var 22,8% minni í desember á föstu verðlagi miðað við sama mánuð í fyrra og dróst saman um 5,5% á breytilegu verðlagi á sama tímabili. Verð á fötum hækkaði um 22,3% á einu ári.
 
Álíka samdráttur var í veltu skóverslana. Þannig minnkaði velta skóverslunar um 22,6% í desember á föstu verðlagi og um 10,7% á breytilegu verðlagi miðað við sama mánuð í fyrra. Það er til marks um samdrátt í skóverslun í desember að hún var aðeins 5% meiri en í janúar sama ár, mælt á föstu verðlagi. Verð á skóm hækkaði um 11,6% á síðastliðnum 12 mánuðum.
 
Í desember minnkaði velta í húsgagnaverslun um 51,3% á föstu verðlagi miðað við desember í fyrra og um 36,6% á breytilegu verðlagi. Húsgagnaverslun dróst einnig saman í desember miðað við mánuðinn þar á undan um 5,5% á föstu verðlagi. Verð á húsgögnum hefur hækkað um 30,1% á síðastliðnum 12 mánuðum.