mbl.is/ÞÖK

Héraðsdómur Reykjaness hefur dæmt karlmann í 15 mánaða fangelsi fyrir tilraun til nauðgunar. Maðurinn reyndi að nauðga 16 ára vinkonu dóttur sinnar sem var gestkomandi á heimili hans.

Brotið var framið á heimili mannsins í apríl í fyrra. Sextán ára stúlkan svaf ásamt þremur öðrum stúlkum í herbergi á heimili hans en eiginkona mannsins svaf í öðru herbergi. Stúlkurnar vöknuðu upp við að vinkona þeirra var að kalla á hjálp en þá hafði maðurinn lagst við hlið hennar og reyndi að toga niður buxur hennar.

Eiginkona mannsins vaknaði skömmu síðar og tók eftir að maður hennar var ekki í rúminu. Hún heyrði grátur og fór því fram úr og sá að rifa var á hurðinni á herbergi stúlknanna. Þá heyrði hún mann sinn segja, „Uss uss, á ég að meiða þig?“

Konan sagðist fyrir dómi hafa reiðst mjög við þetta, ruðst inn og lamið hann í höfuðið. Þá hafi maðurinn hætt og horfið á braut.

Maðurinn var mjög drukkinn þegar þetta var og hafði setið að drykkju í rúman hálfan sólarhring. Hann kvaðst bæði við yfirheyrslur hjá lögreglu og fyrir dómi, ekki muna atburðina.

Í dómsorði segir að við ákvörðun refsingar beri að líta til þess að aðfarir mannsins fólu í sér líkamlegt ofbeldi gagnvart brotaþola sem er yngri en 18 ára. Þá liggi fyrir að stúlkan hafi átt erfitt uppdráttar eftir árásina. Á hinn boginn verði einnig að líta til þess við ákvörðun refsingar að brotið var ekki fullframið.

Maðurinn var dæmdur í 15 mánaða fangelsi. Móðir stúlkunnar fór fram á eina milljón króna í skaðabætur en dómurinn dæmdi stúlkunni 400 þúsund króna bætur.

Maðurinn á að baki töluverðan sakarferil. samkvæmt sakavottorði hlaut hann dóm 1989 fyrir líkamsárás. Árið 1990 hlaut hann tvo dóma, skilorðsbundið fangelsi fyrir skjalafals og auðgunarbrot og seinna á sama ári tólf mánaða fangelsi fyrir auðgunarbrot en þá var fyrri dómur dæmdur upp. Árið 1991 hlaut maðurinn fangelsi í tvo mánuði fyrir skjalafals og auðgunarbrot. Árið 1993 hlaut hann fangelsi í tvö ár í Hæstarétti fyrir skjalafals og auðgunarbrot. Loks hlaut maðurinn fjögurra mánaða skilorðsbundinn fangelsisdóm árið 2001 fyrir auðgunarbrot.