Vegagerðin hyggst tvöfalda Suðurlandsveg frá Hveragerði og austur fyrir Selfoss, alls 12 kílómetra kafla. Markmið þessarar framkvæmdar er að byggja veg með tvær aðskildar akreinar í hvora átt og auka þannig umferðaröryggi, lækka slysatíðni og tryggja greiðari umferð um Suðurlandsveg. Gerð verða mislæg vegamót á allt að 4 stöðum og tengingum þannig fækkað og þær gerðar öruggari. Þá verða tvenn veggöng undir veginn.

Núverandi vegur mun nýtast sem hluti af nýjum tvöföldum vegi og að hluta sem hliðarvegur. Suðurlandsvegur mun víkja frá núverandi legu norðan Selfoss og verða í nýrri legu yfir Ölfusá. Lagðir verða fram tveir valkostir fyrir brúarstæði.

Tvöföldun Suðurlandsvegar og gerð mislægra vegamóta er matsskyld. Drög að tillögu að matsáætlun eru nú til kynningar fyrir almenning í rúmar tvær vikur, til og með 29. janúar 2009, áður en þeim verður skilað inn til formlegrar umfjöllunar hjá Skipulagsstofnun. Matsáætlunina má m.a. sjá á vefnum www. vegagerdin.is. Allir geta lagt inn athugasemdir.