Drög að tillögu að matsáætlun við tvöföldun Suðurlandsvegar frá Hveragerði og austur fyrir Selfoss eru nú í kynningu. Vegurinn verður færður norður fyrir Selfoss og ný brú byggð yfir Ölfusá. Fjallað verður um tvo valkosti við staðsetningu brúar í frummatsskýrslu.

Í aðalskipulagi Árborgar er gert ráð fyrir að leiðin fari um miðja Efri-Laugardælaeyju og komi að landi Laugardæla austan árinnar þar sem nú er rekinn golfvöllur Golfklúbbs Selfoss, Svarfhólsvöllur. Leiðin hefur lengi verið í skipulaginu og önnur uppbygging hefur tekið mið af staðsetningunni.

Hinn valkosturinn, sem Vegagerðin leggur til að skoðaður verði, er að sveigja veginn upp með ánni og þvera hana neðan Grímskletts og yfir á austurbakkann við Ferjuhól við hið gamla ferjustæði Laugardælaferju, á stað þar sem er traustur berggrunnur báðum megin árinnar og gott brúarstæði. Veglínan klýfur útivistarsvæðið við Hellisskóg og klýfur einnig golfvöllinn og fyrirhugað íbúðasvæði Flóahrepps við Svarfhól austan árinnar.