Strætó bs. hefur ákveðið að verða við kröfum þeirra Akurnesinga sem eiga eldri afsláttarkort með gildistíma fram á árið 2009, þannig að þeir geti skipt þeim út fyrir ný kort með sama gildistíma. Enginn aukakostnaður fylgir skiptunum. Eins og fram kom í Morgunblaðinu nýverið kvartaði íbúi á Akranesi undan því til Neytendastofu að geta ekki notað níu mánaða kort sem hann hafði keypt sl. haust.

Þetta er meðal breytinga sem Strætó boðaði fyrir helgi á akstri um Vesturland. Ein helsta breytingin felst í því að bætt hefur verið við nýrri strætóleið, leið 58, sem ekur á milli Borgarness og Hvalfjarðarganga á annatímum. Utan annatíma fer umrædd leið í Háholt í Mosfellsbæ. Leið 57 mun, sem fyrr, aka milli Akraness og Háholts.

Í tilkynningu frá Strætó segir að breytingarnar séu gerðar í ljósi reynslunnar frá áramótum. Er þeim ætlað að tryggja að tímaáætlanir standist betur en áður. „Það er ekki óskastaða að þurfa að gera svo umfangsmiklar breytingar skömmu eftir að nýtt fyrirkomulag er tekið í notkun. Í þessu tilviki þótti það þó nauðsynlegt þar sem ljóst var að kerfið uppfyllti hvorki kröfur okkar né farþega okkar,“ er haft eftir Reyni Jónssyni, framkvæmdastjóra Strætó bs., í tilkynningunni.

Akstur með þessu fyrirkomulagi hefst í dag, mánudag.