Um 12% þeirra sem eru skráðir atvinnulausir gegna reglubundnum hlutastörfum, samkvæmt upplýsingum frá Vinnumálastofnun. Starfshlutfall getur verið allt frá 25% en algengast er að hlutfallið sé á bilinu 50-75%. Miðað við þetta má ætla að um 1.300 manns sem eru skráðir atvinnulausir hafi hlutastörf.

Á vef Vinnumálastofnunar í gær kom fram að tæplega 11.700 væru án atvinnu. Upplýsingarnar sem birtast á vefnum byggjast á tilkynningum um atvinnuleysi en ekki endanlegri skráningu, þ.e. eftir að öllum fylgiskjölum hefur verið framvísað. Hjá stofnuninni fengust þær upplýsingar í gær að 11.246 væri nákvæmari tala um fjölda atvinnulausra.

Í skýrslu Vinnumálastofnunar í desember kom fram að 1.270 erlendir ríkisborgarar væru atvinnulausir en gera má ráð fyrir að um 10-11.000 erlendir ríkisborgarar hafi verið við vinnu um áramótin. Vísbendingar eru um að þeim hafi fjölgað umfram íslenska ríkisborgara á atvinnuleysisskrá, samkvæmt þeim upplýsingum sem fengust hjá Vinnumálastofnun í gær.