mbl.is

Héraðsdómur Suðurlands hefur dæmt karlmann á fimmtugsaldri í árs fangelsi, þar af 9 mánuði skilorðsbundna, fyrir líkamsárás og kynferðisbrot gegn fyrrverandi unnustu sinni.

Maðurinn var einnig dæmdur til að greiða konunni 607 þúsund krónur í skaðabætur auk sakarkostnaðar, 750 þúsund króna.  

Héraðsdómur Suðurlands dæmdi áður í málinu í mars á síðasta ári og var maðurinn þá einnig dæmdur í árs fangelsi, þar af 9 mánuði skilorðsbundið. Hæstiréttur ómerkti hinsvegar dóminn og vísaði honum aftur heim í hérað á þeim forsendum að maðurinn hefði ekki verið spurður um tiltekin atriði í yfirheyrslum.

Maðurinn var ákærður fyrir að hafa í maí árið 2007 ruðst inn í íbúð á Laugarvatni, þar sem þáverandi unnusta hans var gestkomandi, togað hana út úr íbúðinni og inn í bíl sem hann ók að Gjábakkavegi, dregið hana þar út úr bílnum  og slegið hana í andlit eða líkama.

Maðurinn var einnig ákærður fyrir að hafa sett konuna aftur inn í bílinn og ekið að Laugarvatni og dregið þar konuna út úr bílnum, m.a. á hárinu, eftir möl og gangstétt og upp stiga, inn í íbúð hennar á 2. hæð hússins, inn á salerni, lokað hurðinni og veist að henni þar með ofbeldi, afklætt hana og misþyrmt henni kynferðislega og einnig slegið hana í andlitið.

Konan hlaut glóðarauga og mar, rispur og bólgur í andlit, mar á enni og á höfði, eymsl í hársvörð og skrámur og mar víðs vegar um líkamann.