Sjúkrahúsið á Akureyri mbl.is/skapti

Til endurskoðunar er hjá framkvæmdastjórn Sjúkrahússins á Akureyri (FSA) hvort mögulegt sé að breyta framkvæmd sparnaðar á stofnunni frá því sem fyrirhugað var. Ákveðið var að loka dagdeild geðdeilar FSA frá næstu mánaðamótum og sameina hana síðan göngudeild stofnunarinnar næsta haust og var þeirri ákvörðun harðlega mótmælt þegar hún var tilkynnt í desember.

Framkvæmdastjórn FSA greindi forráðamönnum Geðhjálpar frá því að framkvæmdin væri til endurskoðunar, á fundi á Akureyri í dag og formaður og varaformaður Geðhjálpar upplýstu blaðamenn um málið á fundi sem þeir héldu síðdegis.

„Þeir sögðu okkur að það væri verið að fara yfir málið aftur og frétta væri að vænta fljótlega - jafnvel í þessari viku. En því var ekki lofað að hætt yrði við að leggja niður dagdeildina og síðan sameininguna,“ sagði Sigursteinn Másson, varaformaður Geðhjálpar, á fundi með blaðamönnum fyrir stundu. „En við lögðum mikla áherslu á að ekki yrði rof á þjónustu við fólkið.“

Spara átti 17,5 milljónir króna með því að leggja niður dagdeildina í núverandi mynd en Sigursteinn fullyrti í dag að sá sparnaður næðist ekki á þessu ári, m.a. vegna kjarasamninga.

„Við trúum því ekki að þetta verði niðurstaðan fyrr en við tökum á því,“ sagði Svanur Kristjánsson, formaður.

Svanur Kristjánsson og Sigursteinn Másson, formaður og varaformaður Geðhjálpar, á fundi með blaðamönnum á Akureyri í dag. mbl.is/skapti