Maður er í haldi lögreglunnar á Suðurnesjum. Hann var gómaður á flótta eftir að hafa farið óboðinn inn í einbýlishús í Reykjanesbæ í nótt. Fólk vaknaði við heimsóknina og tókst húsráðandanum að koma hinum óboðna gesti út og kallaði til lögreglu. Maðurinn náðist svo á flótta undan lögreglu. Hann var ekki alsgáður og verður yfirheyrður síðar í dag. Svo virðist sem gleymst hafi að læsa húsinu fyrir nóttina, að sögn lögreglunnar. 

Liðsstyrkur var sendur frá Suðurnesjum til aðstoðar lögreglunni á höfuðborgarsvæðinu í gærkvöldi. Helmingur hópsins var enn í höfuðborginni í morgun við eftirlit en hinir komu ósárir til baka.

Enginn slasaðist þegar bíll rann út af gamla veginum að Rockville við Sandgerðisveg í nótt. Tveir voru í bílnum og sakaði þá ekki en bíllinn skemmdist. Mikil hálka var á veginum.