Frá fangabúðunum við Guantanamó flóa á Kúbu Reuters

Amnesty International fagnar ákvörðun Barack Obama um að fresta öllum réttarhöldum sem fyrirhuguð voru fyrir herdómstól í Guantanamó. Í tilkynningu Amnesty segir að samtökin bindi miklar vonir við að þessi fyrstu skref forsetans við stjórnvölin gefi vísbendingar um fyrirætlun hinnar nýju ríkisstjórnar að hverfa frá öllum ólögmætum aðgerðum sem fráfarandi stjórn hefur beitt sér fyrir.

Amnesty International lýsti því yfir á þriðjudaginn síðastliðinn að þessi fyrstu skref nýrrar ríkisstjórnar lofuðu góðu. Þau vonuðust til að þeim yrði fylgt eftir með lokun Guantanamó fangabúðanna og að horfið yrði að fullu frá þessum ólögmætu réttarhöldum.
Amnesty International benti á að Barack Obama hafi undirstrikað í innsetningarræðu sinni að skýr þörf væri á að segja skilið við fortíðina. "Forsetinn kvað valið á milli þjóðaröryggis og hugsjóna byggt á fölskum forsendum, og fagna samtökin því," segir í tilkynningu Amnesty.

Í tilskipun sem gefin var út þann 20. janúar er kveðið á um hundrað og tuttugu daga frest á fyrirhuguðum réttarhöldum í Guantanamó yfir fimm föngum sem sætt hafa leynilegu gæsluvarðhaldi undir eftirliti Leyniþjónustu Bandaríkjanna. Fram kom í fyrrgreindri tilskipun að fresturinn væri nauðsynlegur til að ný ríkisstjórn gæti vandlega farið yfir mál Guantanamó-fanga sem ekki verða leystir úr haldi í bráð, fluttir til síns heima eða til þriðja lands. Þá þurfi að meta hvort lögsókn á hendur þessum föngum eigi rétt á sér og hvaða vettvangur hentar lögsókn af þessu tagi í framtíðinni.

Framkvæmdastjóri Amnesty International, Irene Khan sagði að opinber tilskipun Barack Obama um lokun Guantanamó fangabúðanna væri stórt stökk fram á við og merki um að ný ríkisstjórn væri viljug að hverfa frá misgjörðum fortíðarinnar.

„Með því að láta lokun Guantanamó hafa algeran forgang á fyrstu fjörtíu og átta stundunum í embætti, sendir Barack Obama, þau mikilvægu skilaboð til heimsins, að nú séu Bandaríkin að loka á myrkan kafla í sögu þjóðarinnar."

Amnesty fagnar einnig annarri tilskipun sem Barack Obama hefur undirritað. hún mælir fyrir um að allir starfmenn sem starfa í umboði ríkisins skuli fara að ákvæðum í handbók bandaríska hersins frá árinu 2006, en þau leggja blátt bann við tilteknum aðferðum, ef þær eru notaðar samhliða yfirheyrslu; þar með talið pyndingaraðferðir í vatni (pyndingaraðferð sem líkist drukknun) þvinguð nekt eða kynferðislega niðurlægjandi aðferðir, barsmíðar, rafmagnsstuð, notkun á kuflhettum, öfgar í hitastigi eða sviðsettar líflátsaðgerðir.

Fyrrgreind tilskipun mælir jafnframt fyrir um að Leyniþjónusta Bandaríkjanna loki öllum leynifangelsum, hvar sem þau kunna að vera niðurkominn og leggur bann við starfrækslu slíkra fangelsa í framtíðinni.