Alþjóðahúsið Laugavegi

Alls eru 1.270 útlendingar skráðir atvinnulausir hjá Vinnumálastofnun. Talið er að atvinnuleysishlutfall meðal þeirra sé mun hærra en þau 5% sem hlutfallið er á landsvísu. Líti

Íslenskukunnátta verður þeim helst fjötur um fót við atvinnuleitina enda reyna fyrirtæki helst að halda í þá starfsmenn sem tala íslensku. Atvinnuleysistölur sýna ekki hversu mörg störf hafa tapast því margir hafa flust héðan án þess að skrá sig atvinnulausa.

Útlendingar á íslenskum vinnumarkaði eru nú á bilinu 11.000 til 13.000 talsins, að sögn Karls Sigurðssonar, forstöðumanns vinnumálasviðs hjá Vinnumálastofnun. Þar sem för fólks er frjáls til og frá landinu er ekki tilkynningarskylda um brottför og því ekki til nákvæmar tölur um fjöldann. Sem fyrr er stærsti hópurinn frá Póllandi, en Karl reiknar með að skiptingin sé um 6.000 Pólverjar og 7.000 útlendingar af öðru þjóðerni.

Mikil aðsókn er á skrifstofu Eures – vinnumiðlunar fyrir útlendinga í Borgartúni. Að sögn Þóru Ágústsdóttur ráðgjafa hafa yfir hundrað manns komið þangað í atvinnuleit á hverjum virkum degi í þessum mánuði. „Hér er einhver hópur sem talar einungis sitt móðurmál. Ekki þarf að fjölyrða um að sá hópur stendur mun lakar að vígi en aðrir, sérstaklega þeir sem tala ekki heldur stakt orð í ensku,“ segir Þóra.