Mótmælafundur verður haldin í annað sinn í Mývatnssveit í dag og beinast mótmælin gegn sömu atriðum og hjá fólki sem kemur saman á Ísafirði, Akureyri, Egilsstöðum og í Reykjavík; krafist er afsagnar ríkisstjórnarinnar, bankastjóra Seðlabannkanns og forstjóra Fjármálaeftirlitsinns. „Fjöldi mótmælenda eða stærð byggðarlags skiptir hér ekki máli. Raddir fólksins þurfa að heyrast sem víðast,“ segja skipuleggjendur mótmælanna í tilkynningu.

Mótmælt verður á Hallarflötinni í Dimmuborgum kl. 15.00.

„Í upphafi fundar verður stutt ávarp. Þar á eftir munu fundarmenn sameinast og reisa  táknmynd af föllnu íslandi frá jörðu og koma sterkari stoðum undir landið á ný. Þetta er táknræn athöfn. Fyrst þarf að reisa landið við og að því búnu er hægt að fara að vinna að bættu og réttlátara þjóðfélagi með nýtt fólk í fararbroddi.Þá gefst fundarmönnum tækifæri til að tjá sig í ræðu eða á hvern þann hátt sem hver og einn kýs.  Að þessu loknu verður þagnarstaða í 5 mín. Þar gefs fólki tækifæri til að íhuga ástandið í þjóðfélaginu, þjappa sér saman  og senda frá sér jákvæða orku til uppbyggingar betra samfélags,“ segir í tilkynningu.