Mótmælafundur gegn ofbeldi og eignaspjöllum fer fram á morgun, sunnudag, á Lækjartorgi og hefst kl. 15.00. Tilgangur mótmælanna er að hvetja borgarana til þess að beita ekki ofbeldi í mótmælum.

Í fréttatilkynningu frá aðstandendum fundarins segir að hann sé hugsaður sem tækifæri fyrir alla, sama hvaða stjórnmálaskoðun þeir hafa, til að sýna að þeir viðurkenni ekki ofbeldi sem aðferð til að koma skoðunum á framfæri.

Ræðumenn verða: Sr. Guðni Már Harðarson, prestur í Lindakirkju, Ásgerður Inga Stefánsdóttir, aðstandandi lögreglumanns, Arnór Bjarki Svarfdal, skáti og Hafsteinn Gunnar Hauksson, menntaskólanemi

„Við fögnum mótmælendum sem vilja aðgreina sig frá þeim sem beita ofbeldi, t.d. með appelsínugulum lit. Það er mikilvægt að gefa til kynna að ofbeldið sé ekki samþykkt, svo það festi sig ekki í sessi á Íslandi,“ segir í tilkynningu fundarboðenda.