Wolfgang Pomorin varar við ísnum á Reynisvatni. mbl.is/Kristinn

Umsjónarmenn útivistarsvæðisins við Reynisvatn vara við að ísinn á vatninu er ekki mannheldur nema að hluta. Þar sem það er dýpst er það nú 3-3,5 metra djúpt og þar heldur ísinn ekki.

Um helgar og jafnvel á kvöldin ber á því að krakkar hætta sér út á ís Reynisvatns, en byggðin í Grafarholti er komin alveg að vatninu. Uppi við ströndina er ísinn mannheldur en ekki inni í miðju, þar sem vatnið er dýpst, 3-3,5 metrar. Dýpi vatnsins er nú meira en vanalega þar sem vel hefur runnið í það í vetur.

Umsjónarmenn brýna fyrir foreldrum í Grafarholti að fylgjast vel með því að börn þeirra fari ekki að vatninu og alls ekki út á ísinn. Nú er hláka og því er ísinn hættulegur. Wolfgang Pomorin, umsjónarmaður svæðisins, vill sérstaklega benda á að hann er ekki við vatnið allan daginn nú um stundir þar sem ekki er hægt að veiða í vatninu, en þó er hann ötull við að reka krakka í burtu.