Pihl og Søn áætlar að velta Ístaks dragist saman um helming á árinu. mbl.is/Kristinn

Danir sjá fram á að verða af umtalsverðum tekjum vegna kreppunnar á Íslandi. Áætla dönsk stjórnvöld, að innflutningur frá Danmörku til Íslands dragist saman um 17% á þessu ári miðað við síðasta ár. Þá segir móðurfélag verktakafélagsins Ístaks að velta þess félags muni dragast saman um helming.

Fram kemur á vef Berlingske Tidende, að útflutningur til Íslands svari til 0,5% af öllum útflutningi Dana. Haft er eftir Ernst Hemmingsen, viðskiptaráðgjafa í danska sendiráðinu í Reykjavík, að á síðustu tveimur árum hafi Danir flutt vörur til Íslands fyrir um 3 milljarða danskra króna hvort ár, jafnvirði 64 milljarða íslenskra króna. Nú sé gert ráð fyrir um hálfs milljarðs danskra króna samdrætti eða sem svarar til 17%.

Hann segir, að frá markaðslegum sjónarmiðum hefði verið betra að íslenska ríkisstjórnin héldi velli því það auki líkurnar á því að ró haldist á mörkuðum. „En stemmningin á götunum hefur verið með öðrum hætti," segir hann og vísar til mótmælanna að undanförnu.

Blaðið hefur eftir Jacob Warburg, yfirhagfræðingi danska viðskiptaráðsins, að reikna megi með að danskur útflutningur dragist saman í heild um 4% á árinu. 

Byggingariðnaður liggur nánast niðri á Íslandi um þessar mundir. Berlingske hefur eftir Søren Langvad, forstjóra Pihl og Søn, móðurfélags Ístaks, að búist sé við að velta íslenska félagsins dragist saman um helming á árinu. Veltan var um það bil milljarður danskra króna á síðasta ári, jafnvirði um 22 milljörðum íslenskra króna.

Langvad segir, að þetta muni kalla á tilfærslur í störfum en vonast sé til að hægt verði að bjóða íslenskum starfsmönnum störf í öðrum löndum þar sem  Pihl og Søn er með starfsemi.

Langvad segir að tekjur Ístaks svari til um 15% af heildarveltu  Pihl og Søns. 

Danska félagið Idealcombi framleiðir glugga og hurðir og hefur verið með töluverð umsvif á Íslandi. Berlingske hefur eftir  Claus Winther, sölu- og markaðsstjóra fyrirtækisins, að þar búi menn sig undir að veltan á Íslandi dragist saman um 70%.

„Breytingarnar hafa verið hraðar en það voru þær einnig þegar uppsveiflan hófst. Þegar litið er til þess hve mikið hefur verið byggt (á Íslandi) síðustu árin, er ljóst að það mun líða langur tími þar til jafnvægi næst," segir Winther, sem undirstrikar þó að viðskiptin við Íslands séu þó lítill hluti heildarumsvifa fyrirtækisins.