Frá mótmælum á Akureyri mbl.is/Skapti

Áfram á að efna til borgarafunda að sögn Gunnars Sigurðssonar, sem hefur átt þátt í að skipuleggja borgarafundi undanfarinna mánuða. „Erum við ekki búin að sýna að við náum árangri með því að tala saman?“ spyr Gunnar. „Það er því full ástæða til að nýta það form áfram, koma hugmyndum fólks á framfæri og halda fólki við efnið.“

Hann bendir á að stjórnin sem nú taki við sé heldur ekki endilega sú sem að allir þeir sem sátu fundina hefðu kosið, né séu endilega allir sáttir við þá stöðu sem nú sé uppi. Áherslur fundanna nú verði þó kannski aðrar en áður og menn hugsi e.t.v. meira í lausnum. „Það er mikilvægt að missa ekki niður að fólk sé farið að koma saman og almenningur taki nú meiri þátt en hann gerði.“

Gunnar segir að stefnt sé á að halda stóran borgarafund í Háskólabíói 18. febrúar og þar verði bankamálin mögulega rædd.

Raddir fólksins hyggjast þá standa fyrir 17. mótmælafundinum á Austurvelli kl. 15 nk. laugardag. „Það var ákveðið að halda einn fund til viðbótar. Davíð er ekki farinn,“ segir Hörður Torfason sem hefur verið í forsvari fyrir samtökin.

„Kröfurnar hafa verið mjög afdráttarlausar. Við höfum krafist þess að það verði efnt til kosninga, að stjórnin víki og að stjórnir Seðlabanka og Fjármálaeftirlits víki. Davíð verður að fara ef við eigum að bjarga okkur sem þjóð á alþjóðlegum vettvangi.“

Á Akureyri verður þá áfram efnt til borgarafunda þótt óvíst sé með frekari mótmæli. „Við getum ekkert hætt,“ segir Guðrún Þórsdóttir sem hefur átt þátt í að skipuleggja mótmælin. „Við þurfum öll að standa vaktina svo þetta fari ekki í sama ruglið.“