Laun embættismanna ríkisstofnana sem heyra undir Kjararáð lækka um allt að 15% í næsta mánuði, mest hjá þeim sem bera mest úr býtum. Þetta kom fram í kvöldfréttum Ríkisútvarpsins, haft eftir Guðrúnu Zoëga, formanni ráðsins. Laun ráðherra og þingmanna lækkuðu um áramót.

Kjararáð ákveður laun og starfskjör forseta Íslands, þingmanna, ráðherra, héraðsdómara og hæstaréttardómara. Auk þess ákveður ráðið laun og starfskjör annarra ríkisstarfsmanna sem ekki fá greidd laun samkvæmt kjarasamningum. Alls eru þetta á milli 600 og 700 manns, m.a. forstjórar ríkisstofnana, biskup Íslands, prestar, sendiherrar, skólameistarar framhaldsskólanna og sýslumenn.

RÚV segir forstjóra Landspítalans tróna á toppi þeirra ríkisstarfsmanna sem fá laun ákveðin af kjaradómi, með 1.639.000 krónur á mánuði. Næstur komi forseti hæstaréttar með 1.150.000, hæstaréttardómarar fá 100.000 krónum minna eða 1.040.000 krónur í mánaðarlaun. Ráðuneytisstjórar eru með um milljón á mánuði og sem stendur með hærri laun en ráðherrar, að sögn RÚV.

Með launalækkun kjararáðs segir Guðrún í RÚV að embættismenn sem nú hafa meira en 1.100.000 í mánaðarlaun lækki um 15% í launum. Lægst launaði hópurinn sem eru með innan við 500.000 á mánuði fær 5% launaskerðingu í næsta mánuði.