mbl.isKristinn

Eftir Magnús Halldórsson magnush@mbl.is

Páll Hreinsson, formaður rannsóknarnefndar um bankahrunið, segir erlenda fræðimenn og sérfræðinga hafa mikinn áhuga á að taka þátt í því að greina vandamálin sem ollu því að íslenska bankakerfið hrundi í byrjun október.

Sigríður Benediktsdóttir, sem á sæti í nefndinni með Páli og Tryggva Gunnarssyni, umboðsmanni Alþingis, er nú stödd erlendis þar sem hún meðal annars ræðir við sérfræðinga og fræðimenn. Páll vildi ekki segja við hvaða aðila væri verið að ræða, þar sem ekkert væri ákveðið í þessum efnum ennþá. Sigríður, sem er tölvunar- og hagfræðingur að mennt, er kennari við Yale-háskóla í Bandaríkjunum.

Páll segir að líklegt sé að afleiðing einkavæðingar bankanna, sem lauk árið 2003, verði meðal þess sem nefndin rannsakar. „Það er alveg ljóst að þegar við förum í að skoða eignarhald bankanna og krosseignatengslin, og þau vandamál sem þau geta boðið upp á, þá förum við allt aftur til einkavæðingar bankanna.“

Páll segir nefndinni hafa borist mikið af ábendingum og þá meðal annars frá starfsmönnum bankanna, þeirra sem nú eru fallnir. Þeir hafi sett sig í samband við nefndina og komið til hennar málefnalegum ábendingum, sem full ástæða sé til þess að skoða. „Við höfum fengið töluvert af ábendingum. Það hafa margir núverandi og fyrrverandi bankastarfsmenn komið til okkar upplýsingum sem sýna mögulega óeðlilega viðskiptahætti og einnig upplýsingar um einstakar aðgerðir sem hafa verið til þess fallnar að skapa of mikla áhættu. Þessum ábendingum verður vitaskuld fylgt eftir.“

Rannsóknarnefndin hefur það hlutverk að rannsaka hrun bankanna í byrjun október í fyrra, aðdraganda þess og einnig aðra tengda atburði sem tengjast hruninu með einhverjum hætti. Nefndin hóf störf um áramótin og er ætlað að skila skýrslu sinni 1. nóvember á þessu ári. Sérstakur saksóknari vegna bankahrunsins, Ólafur Þór Hauksson, sýslumaður á Akranesi, hefur það hlutverk að rannsaka og fylgja eftir ætluðum refsiverðum brotum á lögum.