Inflúensan hefur gert vart við sig síðustu vikur og segist Haraldur Briem sóttvarnalæknir reikna með að hún verði áberandi í febrúarmánuði. Hann segir að flensan byrji venjulega frekar rólega, en síðan verði skyndileg aukning og inflúensan geti náð flugi á næstu vikum, en gangi venjulega yfir á 4-8 vikum.

Sóttvarnalæknir fylgist með álagstölum úr heilbrigðisþjónustunni og segir Haraldur greinilegt á sýnum sem greind hafi verið á veirufræðideild Landspítalans að inflúensan sé komin. Samkvæmt tilkynningum frá Læknavaktinni sé einnig ljóst að vaxandi hluti þeirra sem leita þangað er með inflúensu eða inflúensulík einkenni. Haraldur segir að inflúensunnar hafi fyrst orðið vart hjá yngra fólki en fólk í öllum aldursflokkum hafi fengið hana.

Haraldur áætlar að álíka margir hafi látið bólusetja sig gegn inflúensu í haust og undanfarin ár. Um áramót hafi um 50 þúsund skammtar verið farnir út, en 60 þúsund skammtar verið til í landinu. Því sé enn borð fyrir báru og fólk ætti að geta fengið bólusetningu hjá heilsugæslunni.

Inflúensan er af A-stofni að langmestu leyti og hafa tvær tegundir af inflúensu af A-stofni verið að ganga í Evrópu. Í ár er H3N2 stofninn áberandi, en H1N1 hefur haft hægara um sig.

Haraldur sagði að í Svíþjóð hefði inflúensa komið af talsverðum krafti síðustu vikur og sömu sögu væri að segja víðar frá Evrópu. Til Íslands kæmi flensan nokkru á eftir nágrannalöndunum.

„Inflúensa er sjúkdómur sem kemur mjög skyndilega, menn fá beinverki og almenna vanlíðan, hósta, stundum særindi í hálsi, höfuðverk og hita,“ segir Haraldur Briem „Kvefið mallar frekar og læðist að manni, en inflúensan kemur snöggt.“