Klafi annast þjónustu við Grundartangahöfn. Árvakur/RAX

Starfsmenn Klafa við Grundartangahöfn hafa samþykkt verkfallsheimild með öllum greiddum atkvæðum. Formaður Verkalýðsfélags Akraness reiknar með að verkfallið hefjist eftir um tólf daga, að því er segir á heimasíðu verkalýðsfélagsins.

Ríkissáttasemjari lagði fram sáttatillögu í kjaradeilunni við eigendur Klafa, sem eru Elkem Ísland og Norðurál. Í gær voru formaður verkalýðsfélagsins og trúnaðarmaður starfsmanna reiðubúnir að ganga að sáttatillögunni og bera hana undir atkvæði starfsmanna. Samið var fyrir starfsmenn Elkem Ísland sem starfa á sama starfssvæði í desember s.l. Krafa verkalýðsfélagsins fyrir hönd starfsmanna Klafa byggðist á sambærilegum hækkunum og þá var samið um.

Samtök atvinnulífsins og eigendur Klafa höfnuðu hins vegar sáttatillögu ríkissáttasemjara. Þá ákváðu starfsmenn Klafa að kjósa um verkfallsheimildina og samþykktu hana eins og fyrr sagði.

Klafi annast þjónustu við Grundartangahöfn og hefur m.a. séð um uppskipun hráefna og útskipun framleiðslu vara auk þess að þjóna almennt skipaumferð um höfnina.

Heimasíða Verkalýðsfélags Akraness