Alþingishúsið hefur átt undir högg að sækja að undanförnu af hendi mótmælenda sem hafa séð sig knúna til að sýna hug sinn í verki. Fjölmargar rúður eru enn brotnar í húsinu eftir atburði síðustu vikna.

„Það hafa verið brotnar rúður í Alþingishúsinu á öllum hliðum þess. Suma dagana voru rúður brotnar í tugatali. Í mörgum rúðum er glerið sérstaklega styrkt og erfitt og dýrt að skipta þeim út. Við reynum að vinna þetta hægt og rólega í þeirri trú að friðsamari tímar séu í nánd,“ segir Helgi Bernódusson, skrifstofustjóri Alþingis.

Helgi reiknar með að heildarkostnaður Alþingis vegna skemmdarverkanna sé um 12 milljónir króna. „Þetta er mikið tjón sem við horfum upp á. Það hefur einnig mikill kostnaður farið í þrif á húsinu enda hefur nánast þurft að þrífa það dag hvern. Olíumálningu hefur til að mynda verið slett á húsið og hana þarf að þrífa af með háþrýstidælu. Slík þrif fara mjög illa með grágrýtið sem húsið er hlaðið úr.“