ÞG Verk hefur verið með umsvifamestu byggingafyrirtækjum landsins. Ásdís Ásgeirsdóttir

Það væri ódýrara fyrir ÞG Verk að ráða Færeyinga til starfa í Færeyjum en að senda þangað íslenska starfsmenn, að því er fram kemur í bréfi sem Þorvaldur Gissurarson, forstjóri ÞG Verks, hefur sent Finnbirni A. Hermannsyni, formanni Samiðnar, vegna viðtals við Finnbjörn á mbl.is 31. janúar.

Í viðtalinu kvaðst Finnbjörn m.a. hafa vitneskju um að ÞG Verk hafi nýtt sér gengismun á íslensku og færeysku krónunni í tengslum við starfsemi sína í Færeyjum. Þorvaldur segir að með ummælum sínum dragi Finnbjörn upp neikvæða mynd af sjálfsbjargarviðleitni ÞG Verks og geri jafnframt lítið úr þeim íslensku iðnaðarmönnum sem starfi á vegum fyrirtækisins í Færeyjum, en væru annars líkast til atvinnulausir á Íslandi. Þá segir í bréfinu:

„Í nóvember sl. gerði ÞG verk samning við færeyskt verktakafyrirtæki um útselda vinnu iðnaðarmanna (5 menn). Færeyska verktakafyrirtækið greiðir samkvæmt reikningum í íslenskum krónum og tekur þ.a.l. alla gengisáhættu og/eða gengishagnað. Hvað varðar fullyrðingar þínar um mun á launum í Færeyjum og á Íslandi vil ég upplýsa þig um eftirfarandi:
·         Trésmiðir hjá ÞG verk hafa u.þ.b 2.000 kr. í dagvinnulaun og u.þ.b 3.600 í eftirvinnu á klst.
·         Starfsmenn í Færeyjum fá greiddan vinnutíma í ferðalögum til og frá Færeyjum 8 klst. fyrir hverja ferð.
·         ÞG verk greiðir flugfargjöld og annan kostnað vegna starfsmanna í Færeyjum.
·         Starfsmenn í Færeyjum fá greidda dagpeninga í dönskum krónum  DKK 200 fyrir hvern dag.
·         Starfsmenn í Færeyjum fá gistingu og uppihald án endurgjalds.
Algeng  dagvinnulaun iðnaðarmanna í Færeyjum eru um DKK 1.400, eða ISK 2.800 sé miðað við gengi 20,0.“

Þorvaldur segir að tilgangurinn með því að senda starfsmenn til Færeyja hafi verið að forðast enn frekari uppsagnir. Jafnvel þótt það þýddi að greiða þyrfti með starfsmönnunum tímabundið. Þá gagnrýnir hann að formaður sambands iðnfélaga skuli hafa viðhaft þau ummæli sem hann hafði.

mbl.is/Ómar