Frá fundi í borgarstjórn Reykjavíkur. Brynjar Gauti

Eining var í borgarstjórn Reykjavíkur um tillögu borgarfulltrúa Framsóknarflokks og Sjálfstæðisflokks um mótun nýrrar menntastefnu. Var tillagan samþykkt með atkvæðum allra 15 borgarfulltrúanna og sömuleiðis viðbótartillaga Samfylkingarinnar.

Samkvæmt tillögunni verður skipaður vinnuhópur, sem á að móta nýja menntastefnu á grundvelli nýrra laga um leikskóla, grunnskóla, framhaldsskóla, menntun og ráðningu kennara og skólastjórnenda. Huga skuli sérstaklega að eflingu samstarfs milli skólastiga og samvinnu tónlistarskóla, leikskóla og grunnskóla.

Þá á hópurinn einnig að huga sérstaklega að enn frekari samþættingu skólastarfs við frístundastarf sem rekið er á vegum íþrótta- og tómstundaráðs. Hópur um mótun nýrrar menntastefnu taki sérstaklega til athugunar tengsl milli grunnskóla og framhaldsskóla og haldi áfram þeirri vinnu sem hófst árið 2006 og miðaði að hugsanlegri yfirfærslu framhaldsskóla frá ríki til Reykjavíkurborgar.

Borgarráð mun skipa vinnuhópinn, en í honum eiga að sitja fulltrúar úr menntaráði, leikskólaráði og íþrótta- og tómstundaráði, alls fimm fulltrúar. Fræðslustjóri, sviðstjóri leikskólasviðs og framkvæmdastjóri íþrótta- og tómstundaráðs skulu starfa með hópnum. Hópurinn skal hafa samráð við nemendur, foreldra, kennara, skólastjórnendur og aðra starfsmenn borgarinnar eftir því sem tilefni gefst.