Hverasvæðið í Hveragerði er tengt beint við aðalgötu bæjarins í verðlaunatillögu í samkeppni um skipulag miðbæjar Hveragerðis. Í tillögunni er unnið á ýmsan hátt með sérstöðu Hveragerðis og meðal annars gert ráð fyrir uppbyggingu jarðhitasafns.Sautján tillögur bárust í samkeppninni og er Aldís Hafsteinsdóttir, bæjarstjóri í Hveragerði, ánægð með niðurstöðuna. Tillaga ASK arkitekta varð hlutskörpust. Tillögur frá Arkís og Arkitektur.is urðu í öðru og þriðja sæti. Aldís segir greinilegt af tillögunum að fólk hafi skýra sýn á sérstöðu Hveragerðis. Mikið hafi verið unnið með gufu, hverina, gróðurhús, ljós og lýsingu.

Tillaga ASK arkitekta nefnist „Sjálfbærinn Hveragerði“. Þar er gert ráð fyrir beinni tengingu hverasvæðisins í miðjum bænum. Höfundarnir telja að þessa nánd við náttúruöflin megi nýta á margvíslegan hátt, bæði í þágu heilsutengdrar ferðaþjónustu svo sem með baðlækningum, sjálfbærni og vistvænum lífsstíl og með uppbyggingu menntunar og sprotaiðnaðar við matvæla- og lyfjaframleiðslu.

Samið verður við vinningshafann um gerð deiliskipulags fyrir miðbæ Hveragerðis. „Við erum ekki blind fyrir ástandinu og gerum okkur grein fyrir því að ekki verður farið út í framkvæmdir á morgun eða hinn, eða á næsta ári eða þarnæsta. Við erum aftur á móti staðráðin í því að undirbúa það tímabil sem hlýtur að taka við þegar niðursveiflunni lýkur, með uppbyggingu og vexti. Við ætlum að nota þennan tíma, þegar lítið er byggt, til að ljúka skipulagsvinnuna og hugsa til framtíðar með það,“ segir Aldís.