Fasteignafélagið Klasi hf. hefur óskað eftir því við Garðabæ að samkomulag félagsins við bæjarfélagið, vegna áforma um stórfellda uppbyggingu íbúða- og atvinnuhúsnæðis í miðbæ Garðabæjar, verði tekið upp og það endurskoðað. Byggist ósk Klasa á „þeirri stöðu sem komin er upp í efnahagslífi þjóðarinnar,“ eins og orðrétt segir í bréfi sem stjórnarformaður Klasa, Þorgils Óttar Mathiesen, sendi Gunnari Einarssyni 27. janúar. Er þar vitnað til áhrifa bankahrunsins í október á efnahagslíf þjóðarinnar og þá ekki síst fasteignamarkað. Bæjarráð Garðabæjar samþykkti á fundi sínum í gær að fela Gunnari að svara bréfinu frá Klasa fyrir hönd bæjarins.

Í bréfi Þorgils Óttars lýsir hann nokkurri óánægju félagsins með það hvernig viðræður milli félagsins og bæjarins hafa gengið. Í bréfinu segir meðal annars: „Þar sem bæjaryfirvöld reyndust ófáanleg til viðræðna um endurskoðun samkomulagsins, ákváðu forsvarsmenn Klasa að leggja fram nýjar hugmyndir á minnisblaði sem kynnt var bæjarstjóra 11. desember 2008. Þrátt fyrir ítrekuð samtöl og viðræður við bæjarstjóra hafa bæjaryfirvöld ekki sýnt tilburði í þá veru að koma til móts við óskir Klasa um endurskoðun samkomulagsins eða yfir höfuð að gera breytingar á fyrirliggjandi samkomulagi að svo stöddu [...] Framangreind afstaða bæjaryfirvalda er forsvarsmönnum Klasa mikil vonbrigði.“

Samkomulag var gert milli Klasa og Garðabæjar 2006 um mikla uppbyggingu í miðbænum. Samkvæmt samkomulagi stóð til að byggja upp atvinnuhúsnæði, samtals 5.500 fermetra, og allt að 140 íbúðir. Samkvæmt áætlunum átti uppbyggingu hverfisins að ljúka vorið 2010 en þau áform eru nú í uppnámi.

Gunnar Einarsson, bæjarstjóri í Garðabæ, sagði í samtali við Morgunblaðið í gærkvöldi að ekki væri enn ljóst hvernig yrði leyst úr málinu. Þá vildi Gunnar ekki upplýsa það, frekar en Þorgils Óttar, hvort Klasi gerði kröfu um að fá greiddan til baka hluta afþeirri upphæð sem greidd hefði verið fyrir lóðir á svæðinu.