Keflavíkurflugvöllur. Árvakur

„Á öflugum og fjölmennum félagsfundi með öryggisvörðum var samþykkt að leggja það til við Keflavíkurflugvöll ohf. að fara í flatan niðurskurð á launum í stað uppsagna og var þá rætt um 12,5-15% niðurskurð á launum umfram 300.000 krónur á mánuði," segir Þórarinn Eyfjörð, framkvæmdastjóri SFR – stéttarfélags í almannaþjónustu, um uppsagnir á 24 starfsmönnum í öryggisvörslu á vellinum.

„Starfsfólkið vildi sameiginlegt átak vinnustaðarins um að gæta jafnræðis með þessum hætti. Við fórum með þessi skila boð á fund með yfirstjórninni og komum því á framfæri að SFR legði á það ríka áherslu að farin yrði sú leið sem fundurinn samþykkti.“

Yfirstjórn fyrirtækisins, sem tjáir sig ekki um málið, vísaði í undirskriftalista frá hluta starfsmanna sem höfnuðu flatri launaskerðingu.

Hann segir trúverðugleika listans dreginn í efa.

„Það eru uppi efasemdir um að þessi listi sé réttur og eigi sér eitthvert raunverulegt bakland því það hefur enginn fengið að sjá hann.

Þegar yfirstjórn fyrirtækisins var búin að fá þennan lista í hendur taldi hún sér ekki lengur stætt á að fara í flatan niðurskurð.

Þetta finnst okkur vera fyrirsláttur,“ segir Þórarinn og heldur áfram.

„Síðan var mönnum stillt upp við vegg og þeim sagt að annaðhvort yrði þeim sagt upp eða þeir tækju 50% starf og þá kæmi Atvinnuleysistryggingasjóður á móti.

Þeir fóru mest eftir starfsaldri, að sögn, og var yngri starfsmönnum boðin uppsögn strax eða 50% skerðing þegar í stað.

Hér er verið að setja starfsfólkinu afarkosti.

Ríkisstjórnin sem á þetta fyrirtæki hefur sagt að hún muni verja heimilin. Hvar er stjórnin núna?“