Svandís Svavarsdóttir borgarfulltrúi VG í Reykjavík mbl.is

Borgarráðsfulltrúar Vinstri grænna og Samfylkingar hafa lagt fram fyrirspurn í borgarráði um framkvæmd kjaramála og hvers vegna starfsfólk fékk ekki nema 1-2 daga til að bregðast við.

„Í fjárhagsáætlun Reykjavíkurborgar fyrir árið 2009 var gert ráð fyrir að fram næðist sparnaður á árinu sem nemur um 2500 milljónum. Í umræðum um afgreiðslu fjárhagsáætlunar var gert ráð fyrir að 1320 milljónir af þessari upphæð næðist við niðurskurð á launakostnaði hjá starfsfólki borgarinnar. Þar gerði borgarstjóri grein fyrir því að vinna við umræddan niðurskurð væri með tilteknum hætti samkvæmt minnisblaði frá mannauðsstjóra.

Í aðgerðarhópi borgarráðs, var margítrekað mikilvægi þess að vinna af þessu tagi þurfi að eiga sér stað í góðri sátt við stéttarfélög starfsfólks og aðra þá aðila sem málið varðar. Nú er svo komið að fjöldi starfsmanna borgarinnar hefur lýst áhyggjum sínum og vonbrigðum með framkvæmd niðurskurðarins og skamms fyrirvara sem starfsmenn virðast hafa haft til að bregðast við. Í ljósi þess hversu mikilvægt er við þær aðstæður sem nú eru uppi að spilla ekki trausti milli borgarinnar og starfsmanna hennar er spurt:

1. Hver var framvinda framkvæmdarinnar frá samþykkt fjárhagsáætlunar og hver var aðkoma fulltrúa starfsfólks og félaga þeirra að framkvæmdinni?

2. Hvernig og á hvaða forsendum voru teknar ákvarðanir um skiptingu niðurskurðarins milli sviða og hver er niðurstaða niðurskurðarins skipt eftir sviðum?

3. Að hvaða leyti byggir niðurskurðarkrafan á greiningu á þeirri þjónustu sem um ræðir á hverju sviði og þá á því hvaða hluti hennar telst grunnþjónusta?

4. Af hverju fékk starfsfólk aðeins 1-2 daga til að bregðast við?"