Nítján íslenskir kaupendur hótelíbúða á Sommerstedgade 5-7 í Kaupmannahöfn, bæði einstaklingar og lögaðilar, hafa stefnt fasteignasölunni Stórhúsum ehf., eigendum hennar og starfsmönnum vegna þess sem þeir telja ólögmætt gjald og lagt var á þá í fasteignaviðskiptum. Krefjast þeir endurgreiðslu gjaldsins og tilheyrandi kostnaðar.

Einnig hafa kaupendur 34 íbúða í sama húsi kært fasteignasöluna og fasteignasala sem þar starfa til eftirlitsnefndar fasteignasala. Þess er krafist að þau verði beitt viðurlögum samkvæmt lögum um fasteignasölu og eftir atvikum leyfissviptingu.

Þá hefur lögmaður kaupenda 36 íbúða í húsinu skrifað sparisjóðnum BYR og Agnari Agnarssyni, fasteignasala hjá Stórhúsum ehf., og lýst því yfir fyrir hönd umbjóðenda sinna að þeir telji sig óbundna af gerðum samningum vegna íbúðanna.

Vorið og sumarið 2007 auglýsti fasteignasalan Stórhús ehf. til sölu „Norrænar hótelíbúðir“ í miðbæ Kaupmannahafnar. Um var að ræða 57 hótelíbúðir í fyrrnefndu húsi. Þeim skyldi skilað fullbúnum með húsögnum. Í boði voru allt að 90% lán á hverja íbúð. Auglýsingunni lauk á orðunum „Arðbær fjárfesting sem þú mátt ekki missa af“.

Þau sem kærðu til eftirlitsnefndar fasteignasala keyptu íbúðir í húsinu á fyrri hluta ársins 2007. Kaupverð var frá rúmlega 1,6 milljón DKR til ríflega 6 milljóna DKR. Íbúðirnar voru einungis seldar Íslendingum eða félögum í eigu Íslendinga.

Við kynningu á íbúðunum kom m.a. fram að um væri að ræða sérstaka eignaríbúð fyrir hvern kaupanda. Hver eigandi hefði sína íbúð til ráðstöfunar í 3-4 vikur á ári en hún yrði í útleigu á öðrum tímum. Reiknað var með góðum arði af eigninni og að hver íbúð myndi skila 100.000 DKR á hverju ári eftir að búið yrði að greiða gjöld, afborganir af lánum og fleira.

Eigandi fjölbýlishússins var danskt félag, Nordic Service Apartments A/S. Kaupendur voru síðar upplýstir um að félagið var að einum þriðja í eigu félags á vegum Agnars Agnarssonar fasteignasala, þriðjunginn átti BYR sparisjóður og þriðjung átti danskur eigandi.

Kaupendum var gert að borga 2% af kaupverðinu sem „finder's fee“ (fundarlaun) til Stórhúsa ehf. og/eða Scanis ehf. sem tengist Agnari. Það var til að mæta útlögðum kostnaði vegna viðskiptanna og starfa lögmanna. Þess var ekki getið að við það bættist virðisaukaskattur. Kaupendurnir hafa nú stefnt fasteignasölunum fyrir að taka þetta gjald, enda sé það óheimilt samkvæmt fasteignakaupalögum. Þau kveði á um að seljandi skuli bera allan kostnað vegna undirbúnings sölu fasteignar.

Í kærunni til eftirlitsnefndar fasteignasala kemur einnig fram að forsendur viðskiptanna hafi brostið ein af annarri. Þannig hafi engin lánafyrirgreiðsla verið fyrir hendi eins og lofað var. Leigusamningur við hótelrekanda liggi ekki fyrir. Þá hafi Stórhús tilkynnt kaupendum að þeir eigi sjálfir að útvega lánsfé og rekstraraðila.

Agnar Agnarsson fasteignasali segir að gengishrun krónunnar hafi valdið kaupendum erfiðleikum auk þess sem margir hafi tapað miklu á bankahruninu. Hann telur það eiga stóran þátt í að margir vilji nú draga sig út úr kaupunum.

Agnar sagði að fyrirtækið Bröndukvísl, sem hann á þriðjung í, hefði átt þriðjung í húsinu á móti BYR og danska félaginu Friis & Søborg. Hann sagði að leyft væri að taka fundarlaun (finder's fee) við sölu á viðskiptaeignum. Búið er að selja 50 af 57 íbúðum.

Agnar sagði viðræður standa yfir við danskan banka um að fjármagna dæmið. Bankinn vildi að stofnað yrði eitt hlutafélag um húsið. Skattalegar ástæður hefðu ráðið ráðleggingum um að láta félög eiga íbúðirnar. Agnar sagði unnið að því að losa þá kaupendur sem vildu losna út úr kaupsamningum í samvinnu við danska bankann og BYR sparisjóð.

Tilbúinn er samningur við DGI-Byen um rekstur hótelíbúðanna. Húsið á að vera tilbúið í apríl eða maí næstkomandi.