Samkvæmt bráðabirgðauppgjöri Landsbankans fyrir árið 2008 og að teknu tilliti til fjáraukalaga eru gjöld 1.070 milljónir króna umfram tekjur eða 2,7%. Framlag til LSH á fjáraukalögum nam 1.530 m.kr. og þar af var 436 m.kr. framlag vegna uppsafnaðs halla fyrri ára.

Launagjöld eru 0,6% umfram áætlun og því nánast í jafnvægi. Rekstrargjöld eru hins vegar umtalsvert umfram áætlun. Stór hluti innkaupa á rekstrarvörum, s.s. lyfjum og sérhæfðum sjúkrahúsvörum, er skv. samningum sem iðulega eru gerðir í kjölfar útboða og er innkaupsverð beint tengt gengi.

Vextir hafa hækkað mikið sem sýnir vel erfiða greiðslustöðu spítalans á árinu. Útistandandi kröfur hafa vaxið mjög mikið, sérstaklega skuldir annarra heilbrigðisstofnana en það eykur enn á greiðsluvanda LSH og dráttarvaxtagreiðslur vegna skulda spítalans við birgja. Mikilvægt er að finna úrbætur í því máli, að því er segir í starfsemisupplýsingum Landspítalans fyrir árið 2008.

Aukin eftirspurn eftir þjónustu LSH ásamt óhagstæðri gengisþróun vegna erfiðleika í efnahagslífi landsins veldur auknum rekstrarkostnaði á LSH. Að teknu tilliti til óhagstæðrar gengisþróunar má segja að rekstur spítalans hafi gengið vel á árinu. Árið sem í hönd fer er krefjandi vegna hagræðingarkröfu í fjárlögum ársins.

„Stjórnendur spítalans taka hagræðingarkröfunni af mikilli ábyrgð og munu breyta starfsemi spítalans þannig að hún verði ódýrari en markmiðið er samt að skerða ekki þjónustu né rýra gæði hennar," að því er segir í starfsemisupplýsingum LHS.

Starfsemisupplýsingar LHS