Ísland tekur þátt í Heimssýningunni í Shanghai í Kína árið 2010. Þátttaka Íslands er samstarfsverkefni fyrirtækja og hins opinbera. Tekinn hefur verið á leigu 500 fermetra sýningarskáli sem verður á svæði með hinum Norðurlandaþjóðunum. Framkvæmdasýsla ríkisins fyrir hönd utanríkisráðuneytisins óskaði eftir hugmyndum um útfærslu á innanhússskipulagi og sýningu í skálanum með áherslu á sýningarhlutann. Lögð var áhersla á að þeir sem legðu inn tillögur hefðu víðtæka reynslu af hönnun sýninga.

Alls sendu nítján aðilar inn gögn til skoðunar. Þriggja manna valnefnd fór yfir öll innsend gögn og flokkaði þau í samræmi við þær áherslur sem settar voru fram í lýsingu. Niðurstaða valnefndarinnar var að sex tillögur skyldu teknar til nánari skoðunar hjá framkvæmdastjórninni.

Aðilar sem stóðu að tillögunum sex voru: Árni Páll Jóhannsson, hönnuður tillögu ásamt hópi einstaklinga á ólíkum sviðum; Hrafnkell Birgisson og Theresa Himmer; Kjartan P. Sigurðsson og Heng Shi; List og saga, Björn G. Björnsson ásamt samstarfsaðilum og ráðgjöfum; Plúsarkitektar, SagaFilm og SagaEvents og loks TARK teiknistofan efh. og Bysted ehf. Framkvæmdastjórn EXPO 2010 fundaði með valnefndinni, fékk útskýringar og fór nánar yfir tillögurnar sex.

Að lokinni þeirri yfirferð var það niðurstaða framkvæmdastjórnarinnar að óska eftir frekari kynningu frá eftirtöldum tillöguhöfundum: Árna Páli Jóhannssyni, hönnuði tillögu, ásamt hópi einstaklinga á ólíkum sviðum; List og sögu, Birni G. Björnssyni ásamt samstarfsaðilum og ráðgjöfum; Plúsarkitektum, SagaFilm og SagaEvents.