Héraðsdómur Reykjavíkur. mbl.is/Þorkell

Sigurður Pétur Harðarsson kveðst vera sáttur með niðurstöðu Héraðsdóms Reykjavíkur sem í dag dæmdi Sophiu Hansen til að greiða honum tæpar 20 milljónir kr. vegna vangoldinna lána. Auk þess er Sophiu gert að greiða Sigurði 400.000 kr. í málskostnað.

Málið teygir anga sína aftur til ársins 1990 þegar forræðismál Sophiu vegna dætra sinna hófst fyrir tyrkneskum dómstólum. Hún hefur barist fyrir því að fá að umgangast dætur sínar, þær Dagbjörtu og Rúnu. Faðir stúlknanna, Halim Al, hefur ávallt staðið í vegi fyrir því.

„Ég er ánægður með að þessum áfanga sé lokið, og að nú sé hægt að snúa sér að öðrum verkefnum,“ segir Sigurður. Málið tilheyri vonandi brátt fortíðinni.

Aðspurður segir Sigurður að niðurstaðan sé fullnaðarsigur. Þá segir Sigurður að það myndi koma honum á óvart ef Sophia myndi áfrýja niðurstöðunni til Hæstaréttar.

Greiðslurnar sem um ræðir eru lán en ekki laun að sögn Sigurðar. „Þetta eru peningar sem ég lánaði henni í upphafi málarekstursins og svo greiðslur af ýmsu tagi, sem ég hef borgað fyrir hana í gegnum tíðina,“ segir Sigurður og bætir við: „Það hefur aldrei staðið til að vera á launum hjá Sophiu Hansen.“