Léleg brautarskilyrði, skortur á upplýsingum og þreyta áhafnar, eru líklegustu skýringar alvarlegs flugatviks á Keflavíkurflugvelli í október 2007. Boeing 737-800 þotu með tæplega 200 manns um borð hlekktist á í lendingu og rann út af brautarenda. Engan sakaði um borð. Rannsóknarnefnd flugslysa hefur nú skilað skýrslu um atvikið eftir 15 mánaða rannsókn.

Flugvélin var í eigu JetX en var að fljúga fyrir Astraeus. Vélin var að koma frá Antalya í Tyrklandi á vegum íslenskrar ferðaskrifstofu. 188 farþegar voru um borð í vélinni og 10 manna áhöfn.

Vegna langs flugtíma var aukin flugáhöfn og þjónustuáhöfn um borð, þrír flugmenn og 7 flugþjónar.

Um klukkan 02:00, aðfaranótt 29. nóvember 2007, lenti TF-JXF á flugbraut 02 á Keflavíkurflugvelli og endaði utan akbrautar November eða N-4.

Í aðflugi fékk áhöfnin uppgefin bremsuskilyrði og veður fyrir flugbraut 02 í Keflavík og voru þá bremsuskilyrði sögð góð, með ís á stöku stað. Í lendingarbruni varð áhöfn vör við að bremsuskilyrði voru ekki eins og hún bjóst við. Reyndu flugmenn að hægja á flugvélinni með beitingu knývenda og hámarks handvirkri hemlun. Þegar ljóst var að flugvélin myndi ekki stöðvast fyrir brautarenda beygði flugstjórinn vélinni af flugbraut 02 og yfir á akbraut N-4. Þar skreið flugvélin til í hálku og hafnaði með eitt aðalhjóla og nefhjól utan akbrautar.

Engan sakaði um borð. 

Rannsókn rannsóknarnefndar flugslysa, RNF, beindist að fjarskiptum, viðnámsmælingum flugbrauta, flugáætlanagerð og þreytu flugmanna.

Í niðurstöðum lokaskýrslu RNF eru sett fram fjölmörg atriði sem skýrt geta þetta alvarlega atvik.

Fram kemur að áhöfnin hafði verið á vakt í 17 klukkustundir og 20 mínútur. Þegar samskipti voru yfirfarin í flugstjórnarklefa kemur fram að þreyta var farin að segja til sín hjá áhöfn. Samskiptum flugturns og áhafnar vélarinnar virðist hafa verið ábótavant en út frá upplýsingum flugturns áleit flugmaður að brautarskilyrði væru önnur og betri en raun bar vitni. Flugáætlanagerð JetX var ekki sem skyldi. Uppgefið var að vélin tæki 186 farþega en 189 sæti voru seld og þar með sæti í svæði sem sérstaklega var ætlað sem hvíldaraðstaða áhafnar vegna langs flugtíma. Þá hafði þreyta áhrif á ákvarðanatöku flugmanns sem sá um lendingu, að mati RNF.

Í skýrslu RNF er bent á átta atriði sem betur mættu fara. Bæði JetX og yfirvöld á Keflavíkurflugvelli hafa þegar brugðist við og hreint í framkvæmd nokkrum þeirra atriða sem bent er á í skýrslunni. Þá hefur reglugerð um flug- og vinnutímamörk og hvíldartíma flugverja verið breytt. Ný reglugerð tók gildi 1. febrúar síðastliðinn en samkvæmt henni er hámarksflugvakt 13 klukkustundir en heimilt að lengja hana og þá með því að fjölga í áhöfn og gæta ákvæða um hvíldartíma.