Héraðsdómur Reykjavíkur hefur sýknað tólf einstaklinga af kröfum lóðarhafa í Kópavogi. Lóðarhafarnir fóru fram á að ummæli sem viðkomandi einstaklingar viðhöfðu í bréfi til bæjarráðs Kópavogs yrðu dæmd dauð og ómerk. Dómurinn taldi ekki nægileg efni til að dæma ummælin ómerk enda væri ekki um að ræða móðganir eða aðdróttanir í skilningi laganna.

Ummælin voru m.a.: „Að setja fatlað barn í forgrunn baráttu um breytingar á húsi sem ber þess engin merki að vera hannað með hliðsjón af þörfum þess að frátaldri lyftu, þar sem m.a. húsið er á þremur pöllum. Gnitakór 13 er ekki yfir aðra íbúa bæjarins hafinn“ og „Við höfum það fyrir víst að lóðarhafi nr. 13 hafi haft á orði að þau hafi ákveðið að bíða með að hefja framkvæmdir þar til önnur hús í nágrenninu væru risin til að hanna hús með besta útsýnið því útsýnið hérna væri milljóna króna virði. Eigum við sem byggjum á réttum tíma að gjalda fyrir það?“.

Lóðarhafarnir fengu árið 2003 úthlutað lóð að Gnitakór 13 í Kópavogi. Hugmyndavinna um húsagerð var langt á veg komin þegar ungur sonur þeirra greindist með alvarlegan og banvænan vöðvarýrnunarsjúkdóm. Framkvæmdir voru því lagðar til hliðar. Á miðju ári 2006 lögðu þeir fram teikningar að húsi sem kölluðu á breytingar á deiliskipulagi. Þær breytingar náðu ekki fram að ganga vegna athugasemda nærliggjandi lóðarhafa. Í byrjun árs 2007 lögðu þeir fram nýja teikningu og voru tillögur til breytingar á deiliskipulagi senda öðru sinni í grenndarkynningu. Aftur komu fram athugasemdir sem lóðarhafarnir töldu sig hafa komið til móts við.

Skipulagsnefnd bæjarins samþykkti erindi lóðarhafanna með þeim rökstuðningi að komið hefði verið til móts við athugasemdirnar. Erindið var því sent bæjarráði til afgreiðslu. Þegar taka átti erindið fyrir var einnig lagt fram bréf nærliggjandi lóðarhafa, stefndu í málinu. Þeir töldu ekki fram komna þörf til að víkja frá deiliskipulagi til að gæta sérstakra þarfa lóðarhafa Gnitakórs 13.