Álfheiður Ingadóttir. mbl.is

Álfheiður Ingadóttir, formaður viðskiptanefndar Alþingis, segir að í athugasemdum Alþjóðagjaldeyrissjóðsins (IMF) við frumvarpi um breytingar á lögum um Seðlabankann sé ekkert sem ekki hafi komið fram í umræðum á Alþingi eða á fundum viðskiptanefndar. Alþingi hafi löggjafarvaldið og þingmenn muni hlusta á allar athugasemdir, þ.m.t. frá sjóðnum.

Álfheiður vill ekki segja hvað henni finnist um frumvarpið en sjálfstæðismenn hafa gagnrýnt það harðlega og framsóknarmenn lýst efasemdum um ákveðna þætti þess. „En ég hlusta á það sem menn hafa fram að færa, bæði þingmenn í ræðum og athugasemdum og eins á þá sem koma fyrir nefndina," sagði hún í samtali við Morgunblaðið í dag. Frumvarpið væri til umfjöllunar í viðskiptanefnd og aftur yrði fjallað um það á nefndarfundi á mánudag.

Álfheiður sagði að margar gagnlegar ábendingar hefðu komið fram á fundi viðskiptanefndar í morgun, ekki bara um það sem þyrfti að bæta í frumvarpinu heldur líka um það sem þyrfti að breyta í núgildandi lögum um Seðlabankann. Einnig hefði verið bent á nauðsyn þess að nefndin tefði ekki afgreiðslu frumvarpsins að nauðsynjalausu, m.a. hefði Alþýðusamband Íslands lagt áherslu á það.

Fram hefur komið að viðskiptanefnd veitti Seðlabankanum sem og öðrum sem beðnir voru umsagnir aðeins tveggja daga frest til að senda nefndinni athugasemdir um frumvarpið. Aðspurð hvers vegna fresturinn væri svo stuttur sagði Álfheiður að enginn annar en Seðlabankinn hefði óskað eftir framlengingu á þeim fresti en bankinn hefði fallist á að skila inn umsögn á mánudaginn.

En tveggja daga frestur, er það ekki óvenju stuttur frestur?

„Það er ekki óvenjulega stuttur frestur í máli af þessari stærðargráðu. Ég vek athygli á því að öll stærstu mál sem varða efnahagshrunið voru ekki einu sinni send út til umsagnar," sagði hún. Um væri að ræða um tug laga sem hefðu verið sett í tengslum við hrunið. „Þetta mál er þess eðlis er að það er mikill skaði ef það væri látið liggja hér inni á þinginu að nauðsynjalausu, það þarf að ljúka þessu máli og létta þessari óvissu."