Ríkisstjórnin á ríkisráðsfundi. mbl.is/Ómar

Ríkisstjórnin samþykkti í morgun  tillögu Jóhönnu Sigurðardóttur, forsætisráðherra, um að sett verði laggirnar framkvæmdanefnd um efnahagsstefnu ríkisstjórnarinnar.  Í henni eiga sæti forsætisráðherra og fjármálaráðherra en með nefndinni starfar verkefnisstjóri sem ætlað er að  tryggja framgang og samhæfingu þeirra verka sem ákveðin verða af hálfu ríkisstjórnar.

Guðmundur Árnason, ráðuneytisstjóri í menntamálaráðuneytinu sinnir nú starfi verkefnisstjóra.

Ragna Árnadóttir, dómsmálaráðherra kynnti á ríkisstjórnarfundinum breytingu á lögum um íslenskan ríkisborgararétt og jafnframt frumvarp til laga um breytingu á lögum um aðför, nauðungarsölu og gjaldþrot, en þessi mál voru á verkefnaskrá ríkisstjórnarinnar og er ætlað að bæta stöðu skuldara.

Steingrímur J. Sigfússon, fjármálaráðherra lagði fram tvö mál í ríkisstjórn í morgun. Þar var m.a. um að ræða lagabreytingar til að styrkja skattaframkvæmd og vinna gegn skattundanskoti og enn fremur frumvarp til laga um afnám laga um eftirlaun forseta Íslands, ráðherra, alþingismanna og hæstaréttardómara. Gert er ráð fyrir að eftirlaunakjör þessa hóps verði samræmd eftirlaunakjörum opinberra starfsmanna. Frumvarpið verður í kjölfarið kynnt í þingflokkum stjórnarflokkanna og Framsóknarflokksins.