Árni Finnsson, er formaður Náttúruverndarsamtaka Íslands.

Náttúruverndarsamtök Íslands hafa sent Steingrími J. Sigfússyni sjávarútvegsráðherra bréf þar sem fram kemur að hætt sé við því að Ísland verði sakað um tvískinnung gangi ákvörðun fyrrverandi sjávarútvegsráðherra, Einars K. Guðfinnssonar, eftir, þ.e. að leyfa hvalveiðar.

Fram kemur í bréfinu að Einar hafi gert því skóna að útflutningsverðmæti hvalaafurða gætu numið allt að 5 milljörðum króna á ári. „Það gerir 20 milljónir kr. fyrir hverja veidda skepnu miðað við 150 langreyðar og 100 hrefnur. Samkvæmt svari sjávarútvegsráðherra við fyrirspurn Marðar Árnasonar voru útflutningsverðmæti hvalaafurða árið 2008 13.428.571 kr. fyrir hvert dýr og yrði lægri ef gert er ráð fyrir stærðarmuni á hrefnu og langreyði. Munurinn er 6,5 milljónir. Hverju sætir þessi munur,“ spyrja samtökin í bréfinu.

Tekið er fram í bréfinu að:

• Samkvæmt opinberum tölum nema birgðir af hvalkjöti í Japan ríflega 3000 tonnum um þessar mundir.
• Undanfarinn áratug hefur verð á hvalkjöti í Japan lækkað um 50%.
• Framboð á hvalkjöti í Japan hefur aukist í takt við auknar veiðar í vísindaskyni. Á yfirstandandi vertíð er gert var ráð fyrir að veiða 935 hrefnur í Suðurhöfum.
• Ein langreyður samsvarar um það bil 8 hrefnum og því má álykta að 150 langreyðar jafngildi af 1200 hrefnum. Við bætast a.m.k. 80 hrefnur.
• Fyrirhugaður útflutningur á hvalkjöti myndi nær tvöfalda framboð á hvalkjöti í Japan og verð lækkaði.

„Samkvæmt 65. grein Hafréttarsáttmála Sameinuðu þjóðanna gilda um sjávarspendýr sérstakar reglur þess efnis að ríki skuli eiga samvinnu um verndun þeirra, einkum hvala. Ísland hefur fullgilt Hafréttarsáttmálann og barist fyrir fullgildingu hans á alþjóðavettvangi. Því er hætt við að Ísland verði sakað um tvískinnung gangi ákvörðun Einars K. Guðfinnssonar eftir,“ segir í bréfinu.