Eftir Þóru Kristínu Ásgeirsdóttur MBL sjónvarpi. tka@mbl.is

Hulda Gunnlaugsdóttir, forstjóri Landsspítala, segir ekki hægt að spara 2,3 milljarða króna á Landspítalanum án þess að draga úr þjónustu. Það sé þó hægt að ná langt.

Hún segir óumflýjanlegt að segja upp starfsfólki. Auk þess verður skorin upp herör gegn yfirvinnu á spítalanum.  

Sviðsstjórum Landspítalans hefur verið fækkað um fjórðung til að stuðla að valddreifingu og fækka boðleiðum, þeir halda hinsvegar sínum launum í öðrum störfum á spítalanum.  Fyrirhugað er að sameina margar deildir spítalans sem leiðir til þess að deildarstjórum fækkar mikið og það á að spara peninga.

Hlutastörfum verður fækkað á spítalanum en tíðkað hefur verið að jafna út mismuninn með yfirvinnu og hífa þannig upp launin. Það mun í framtíðinni heyra sögunni til, hjá öllum starfsmönnum spítalans, líka læknum.

Hulda segir að það þurfi að skilgreina verkefni Landspítalans betur og beina fólki á rétta staði, svo sem til heimilislækna eða félagsþjónustu.  Hún óttast mest ef sparnaður bitnar enn frekar á húsnæði eða tækjabúnaði. Það sé nóg af hugviti og starfsfólki á spítalanum en hann sé í lélegu húsnæði og eigi léleg tæki. 

Ögmundur Jónasson, heilbrigðisráðherra, mætti á starfsmannafund á Landspítala í hádeginu í dag.