Jóhanna Sigurðardóttir. Kristinn Ingvarsson

Jóhanna Sigurðarsdóttir, forsætisráðherra, sagðist á Alþingi í dag hafa tekið það einu sinni eða tvisvar upp í ríkisstjórn, að fyrrverandi félagsmálaráðherra skipaði fyrrverandi aðstoðarmann formann stjórnarnefndar um málefni fatlaðra til fjögurra ára skömmu fyrir þingkosningarnar 2007.

Jóhanna skipti um formann stjórnarnefndarinnar eftir að hún tók við embætti félagsmálaráðherra voruð 2007. Maðurinn fór í mál og krafðist bóta á þeirri forsendu að félagsmálaráðuneytið hefði ekki farið að lögum þegar honum var vikið úr embættinu. Héraðsdómur Reykjavíkur féllst á þau rök og dæmdi ríkið í desember sl. til að greiða manninum 500 þúsund krónur í bætur. 

Ólöf Nordal, þingmaður Sjálfstæðisflokks, tók málið upp á Alþingi í dag og spurði hvernig Jóhanna ætlaði að bregðast við þessum dómi. Jóhanna sagði að þegar um stjórnarskipti væri að ræða væri mjög algengt að óskað væri eftir því að trúnaðarmenn eldri ríkisstjórna væru beðnir að víkja fyrir trúnaðarmönnum nýrra ráðherra.

Jóhanna sagði, að það væri mjög sérkennilegt að viðkomandi maður hefði ekki orðið við því að víkja úr stjórnarnefndinni þegar eftir því var óskað. Sagðist Jóhanna hafa tekið málið upp í ríkisstjórn og þar hefðu menn verið yfir sig hneykslaðir. Þá sagði Jóhanna að það væri rangt, að maðurinn hefði ekki notið andmælaréttar vegna þess að hún hefði boðið honum að koma á sinn fund en hann ekki þáð. „Dómurinn er fallinn og ég viðurkenni hann en að mörgu leyti var mjög sérkennilega staðið að þessu af aðstoðarmanni fyrrverandi félagsmálaráðherra," sagði Jóhanna.

Ólöf sagði að málið snérist greinilega um að maðurinn hefði verið framsóknarmaður. Hún væri ekki að gagnrýna að ráðherrann hefði viljað skipta um menn en það yrði að viðurkennast, að stjórnsýsla í félagsmálaráðuneytinu hefði ekki verið til fyrirmyndar í þessu máli.