Gylfi Arnbjörnsson, forseti ASÍ. mbl.is/Ómar

Tillögu fimm aðildarfélaga Alþýðusambands Íslands, um að launafólk greiði atkvæði um frestun hækkana var vísað til samninganefndar ASÍ.

Formannafundur Alþýðusambands Íslands fjallaði í gær um beiðni Samtaka atvinnulífsins um frestun á endurskoðun kjarasamninga til sumars og þar með frestun launahækkana.

Frestun var samþykkt til júníloka og þar með frestað þeim launahækkunum til félagsmanna á hinum almenna vinnumarkaði sem ættu að koma til 1. mars nk. Yfirgnæfandi meirihluti formanna aðildarfélaga ASÍ taldi skynsamlegast við núverandi aðstæður að fresta endurskoðuninni og freista þess að halda í innihald kjarasamningsins og ná hækkunum fram síðar.

Fjörugar umræður sköpuðust á fundinum og voru það einkum formenn nokkurra félaga á landsbyggðinni sem höfnuðu hugmyndinni um frestun algerlega. Þeir vildu launahækkanir 1. mars eins og samningar kveða á um. Það var hins vegar mat þeirra formanna sem voru á móti því að fresta launahækkunum að ekki væri grundvöllur fyrir því að fresta hækkunum til handa þeim sem starfa á lágmarkstöxtum.

Formaður Verkalýðsfélags Akraness sagði með öllu óviðunandi að lágmarkslaun væru lægri en atvinnuleysisbætur og það væri eitthvað sem þyrfti klárlega að lagfæra við þessa endurskoðun.

Atvinnuleysisbætur eru nú 149.523 krónur á mánuði. Að auki eru greiddar 276 krónur á dag með hverju barni undir 18 ára sem er á framfæri bótaþega. Lægstu launataxtar eru í kringum 140 þúsund krónur á mánuði.

Á fundinum í gær lögðu Verkalýðsfélag Akraness, Framsýn á Húsavík, Verkalýðsfélag Vestfirðinga, Afl - starfsgreinafélag Austurlands og Drífandi í Vestmannaeyjum fram tillögu um að ef gert yrði samkomulag við Samtök atvinnulífsins um frestun á hækkun launa 1. mars nk. þá skyldi sú frestun lögð til atkvæðagreiðslu á meðal allra félagsmanna sem vinna eftir þeim samningum sem um ræðir.

Gylfi Arnbjörnsson, forseti ASÍ taldi formannafundinn ekki geta afgreitt umrædda tillögu og var henni því vísað til samninganefndar ASÍ.

Vilhjálmur Birgisson, formaður Verkalýðsfélags Akraness segir að fróðlegt verði að sjá hvort samninganefnd ASÍ afgreiði þessa frestun án þess að leggja hana í atkvæðagreiðslu á meðal félagsmanna sem starfa eftir þeim samningum sem um ræðir.